前公民黨成員、註冊社工曾健超因「襲警」、「拒捕」罪成被判監五星期。一個社工犯「襲警」罪，社工註冊局好應該嚴肅處理，起碼都要停曾健超社工牌一段時間；點知，之前一直未就懲處曾健超作出決定嘅社工註冊局，據報竟然只係對曾健超作出「書面警告」，有消息仲話咁係因為曾健超行動為爭取「公義」喎。大哥，「襲警」喎！乜有政治理由而使用暴力、襲擊警察，咁就可以唔使罰？咁以後個個社工話為公義，係咪都可以唔罰先？

註冊局一直議而未決 最後竟放生曾健超

社工註冊局事隔咁耐先決定以「書面警告」曾健超，安排可以話係非常唔妥。曾健超上年五月被判罪成，今年三月尾放棄上訴即時入獄、四月出獄，社工註冊局之前最少開過兩次會，都未有懲處曾健超嘅裁決；屈指一算，由曾健超罪成到而家差唔多已經一年半，註冊局咁「嚴肅」處理事件到最後竟然係書面警告一個襲警罪成嘅社工，係咪有違公眾期望先？社工註冊局事後仲要收收埋埋，係咪註冊局都覺得自己決定有問題，「心中有鬼」所以唔對外公布？

事實上，有政治理由甚或爭取民主，統統都唔係可以係輕罰嘅理由，今日曾健超一句「為公義」襲警而唔駛畀專業團體罰，係咪下次有社工因為「政治理由」而犯法，又要因為有「政治理由」而唔處分呢？咁社工呢個講究個人道德操守嘅專業團體，又點維護社工嘅專業形象呢？一班受社工協助嘅受眾，又會唔會面對一啲壞榜樣，產生不良後果呢？

襲警非輕微罪行

囍雨明白，社工都係人、都會犯錯，如果有社工犯錯而知錯能改，大家都應該給予機會；不過，囍雨必須指出，曾健超所犯下嘅襲警、拒捕罪名唔係咩小事，而係頗為嚴重嘅罪行，註冊局咁都可以輕輕「放生」曾健超？再者，曾健超由頭到尾都無表現出「知錯」嘅悔意，成日仲將公義等掛喺口邊，一個「不知錯又不改」嘅人，真係值得註冊局「放生」佢？

老實講，囍雨極度懷疑社工註冊局入面嘅「黃絲」成員有心放生曾健超，因為社工註冊局主席曾經喺參選註冊局時候講過「若有社工因公民抗命，被定罪而影響註冊，實屬荒謬」，倫智偉應該向公眾交待清楚，佢哋係咪因為政治理由「放生」曾健超！

原圖：RTHK