違法佔領發生三年，一眾主事者至今依然未承擔罪責，完成佢哋當初說好的「公民抗命」；當年呢班人搞違法「佔中」，充其量都係話要爭取符合佢哋心意嘅普選，但事情發生到今日，好多「傘後」組織、本土派都變成爭取香港獨立，囍雨懷疑，連當初講明自己唔係要搞「港獨」嘅戴耀廷，都可能慢慢走上播「獨」之路。

點解咁講，事關佢近日出席論壇，話中國有可能崩潰，叫大家要建立屬於自己嘅「主體」咁話。聽到呢番說話，囍雨即刻諗起「港獨」派最鍾意聽嘅「支爆論」，戴耀廷究竟又想玩邊科？

戴耀廷想「中國崩潰」？

日前戴耀廷出席一個名為「建構香港主體 再思中國論述」嘅論壇，一睇個論壇題目，就Feel到「獨」味相當重下，基於篇幅所限，其他講者嘅講話內容囍雨就唔逐一講喇，但戴耀廷嘅一番說話，真係令人有無窮幻想！喺論壇上，戴耀廷話內地發展有好多可能性，包括「中國崩潰」，屆時內地同香港關係發展可能性會隨之不同，仲叫人無論內地日後有咩變化，香港都要建立屬於自己嘅「主體」。

一聽到呢番說話，囍雨即刻諗起「港獨」派成日最鍾意講嘅「支爆論」，大約意思係話如果中國有一日「爆煲」、「崩潰」，香港要獨立嘅契機就在此時。戴耀廷講出呢番說話，感覺如同公民黨陳家洛經常叫學生諗下如果「五星紅旗升不起」，大家要點做一樣。

曾表明不搞港獨

記憶所及，就算戴耀廷點反政府都好，佢一直都聲稱自己唔係要搞「港獨」，但佢突然講呢番「獨」味濃厚嘅說話，係佢立場已經改變咗，定純粹為滿足論壇參加者嘅口味，囍雨真係想戴耀廷向公眾「講清講楚」。當初佢只係叫大家「公民抗命」，總算未觸及到國家主權、統一嘅問題；如今佢話鋒一轉，倘若佢真係認為「中國崩潰」，繼而香港建立屬於自己嘅「主體」（意指國家），咁就真係更加大件事喇！

戴耀廷作為大學副教授，絕對冇可能唔知佢自己呢番說話咩意思，如果佢咁多年嚟搞咁多嘢最終係想搞「港獨」，以佢策動長達79日嘅違法「佔中」做參考，可能香港之後又要畀班政棍搞到「大亂」一場喇！

原圖：RTHK