社民連主席吳文遠涉嫌喺舊年向時任行政長官梁振英擲三文治，擊中旁邊一名署理總督察，被控普通襲擊；已經被法庭斷定表證成立嘅吳文遠，日前突然改為自辯，親自盤問辯方證人、前特首梁振英，喺庭上不斷問梁振英與案件無關嘅問題，甚至想將梁振英轉做敵意證人。呢個唔要律師改為自辯盤問梁振英，仲要問好多唔相關問題嘅被告吳文遠，到底搞邊科？係真心為自己抗辯，定係有其他目的？

是盤問？抗辯？還是抗爭？

由於有關案件仍然在審理當中，對於案情或者法庭應該如何判決囍雨唔會畀意見，不過見到吳文遠選擇自辯而問一啲與案件唔相關嘅問題，囍雨真係有啲摸不着頭腦。明明有辯護律師，但突然轉做自辯同埋親自盤問梁振英，呢個係咩玩法？係咪吳文遠覺得自己盤問技巧好過律師，自辯嘅勝訴機會會更大？定係有其他目的？問咁多與案情無關嘅嘢，又係咩玩法？

舉幾個例子，例如吳文遠要梁振英做番案發時嘅表情出嚟，然後連裁判官都話如果要睇番當時梁振英表情，可以睇番當時嘅錄影帶；之後問梁振英案發時嘅身份，梁振英答行政長官，就問梁振英係邊度嘅行政長官，話梁振英講漏咗「香港」兩個字，都幾大鑊。尤有甚者，吳文遠又問梁振英識唔識黑社會成員，裁判官表明問題與案件無關，毋須回答。呢啲問題係咪真係同案件有關呢？吳文遠係抗辯，定係抗爭呢？

吳文遠成日想出位？

今次佢喺法庭自辯加上演盤問梁振英一幕，動機為何佢自己最清楚，但老實講，吳文遠嘅作風，囍雨一直都不敢恭維架喇，成日喺度搞事搏出位。囍雨曾經睇吳文遠Facebook或者公開講話，類似話自己見到其他人喺立法會「抗爭」，自己都好想、一定要入到立法會咁話；其實想「上位」、做議員，方法有好多，囍雨就認為最好方法都係少啲搞事、多啲做事，話畀人聽自己係為市民做事嘅。

原圖：hket