「佔領中環」喺6月22日舉行「全民投票日」，聲稱畀市民投票選出心儀既普選方案，可惜反應冷淡。「佔中」主事者見到市民反應一般，又提出加一條原則立場畀市民表決。所謂全民投票選出心儀方案係假既，因為可供選擇既方案，都係有公民提名既方案。至於所謂原則題目亦係流既，因為所謂原則只係「佔中」者不切實際既要求；如果市民參與「全民投票日」，輸既只有市民！

「全民投票日」畀大家選擇既方案，係經過「佔中」班人篩選再篩選，試問得三個都包含公民提名既方案，有選擇等於無選擇，又點樣畀市民選到自己心儀既方案呢？如果喺無真正選擇既情況下畀人投票，就算開放畀全民投票又有咩意義？

至於新加既題目，即「如果政府方案不符國際標準讓選民有真正選擇，立法會應予否決」，只係一條既誤導人，又不切實際既假設性問題；如果一個方案，符合所謂國際標準，但唔符合《基本法》，就算立法會通過呢個方案，呢個方案一樣站唔住陣腳。佔領中環主事人只講國際標準，漠視《基本法》既做法，佢哋推動既方案唔單只唔會成事，仲會令好多信佢哋既市民失望，因為唔啱《基本法》既方案，根本唔會實行到。

雖然「全民投票日」多加一條原則性題目畀市民投票，如果市民唔投方案、只投原則，其實一樣係跌入圈套。點解咁講？「佔中」主事者，將佔領中環視為神聖行動，只要政府方案稍稍唔合佢哋心意，就算市民無就「全民投票日」三個方案投票，只要就原則問題投票，「佔中」主事者一樣可以話投票者支持方案要有國際標準，所以有「民意基礎」佔領中環。

可能好多人都未必同意公民提名，更唔同意犯法既佔領中環行動，但如果因為「佔中」行動既宣傳而就任何問題投票，你既一票就會成為佔領中環既籌碼。屆時萬一佔領中環行動造成破壞，甚至傷亡，投票者可能變成幫凶。要避免被「佔中」行動騎劫、利用，就要杯葛投票，向「佔中」說不！

原圖：網絡圖片