盲反派成日到英、美等地唱衰香港，其實都唔係咩新聞，當中最出名嘅梗係有前政務司司長陳方安生、資深大律師李柱銘以及香港眾志黃之鋒啦。呢種「唱衰」風氣蔓延到各光譜嘅盲反派人士，最近立法會議員楊岳橋、許智峯以至朱凱迪等人都去咗英國，齊齊唱衰香港。佢哋實質講過啲咩，囍雨當然唔夠清楚啦，但觀乎傳媒報道，佢哋又係想攞議員被DQ、「雙學三人」被判監等做例子，想英國「正視」香港問題；囍雨就喺度諗，政府、律政司依法辦事，佢哋去外國唱衰港府，算唔算係破壞法治呢？

議員就不用守法？

其中一個去英國唱衰香港嘅香港眾志常委林淳軒，話議員被DQ（取消議員資格）係政治篩選，仲話政府打壓立法機關，三權分立受壓，係直接挑戰「一國兩制」咁話。囍雨就想問下林淳軒，佢不如問下同佢見面嘅英國國會議員，如果喺英國國會唔依法宣誓，仲有冇資格做國會議員？根據林淳軒嘅套路，好似講到民選議員就可以為所欲為咁，咁民選議員駛唔駛遵守法律先？難道民選議員就高人一等，可以無視相關法律？林淳軒唱衰香港，都應該顧下事實架！

至於另一個有去英國嘅立法會議員陳志全，就話擔心立法會補選果時，中方會將反對派同「港獨」畫上等號，要英國留意港府會否透過確認書阻止部分人士入閘；根據囍雨嘅解讀，陳志全係怕盲反派有人「誤中副車」，無提倡「港獨」都會被禁入閘，咁言下之意係咪都贊成「港獨」人士唔應該入閘呢？如果唔係嘅話，佢呢番話有咩意思呢？再者，陳志全叫英方留意情況，係咪即係要「外國勢力」插手香港事務？囍雨覺得，可能陳志全心底都覺得唔畀「港獨」人士入閘有道理，不過就唔好搞到佢哋班無搞「港獨」嘅激進派喇！

違法無罪 執法有錯？

其實，囍雨真心覺得盲反派好屈機架，明明自己或啲自己友犯咗法，畀檢控部門告就話係政治檢控，畀檢控部門刑期覆核就變咗政治打壓，如果特區政府唔想畀人唱衰，唯一嘅方法就係唔好告呢班人囉！不過，囍雨覺得無論畀人點詆譭都好，特區政府都要堅守底線，該告就告；至於班盲反派要講咩，或者要飛去邊個國家度投訴，就由得佢哋啦！因為佢哋由頭到尾都唔係咩捍衛緊「一國兩制」，而只係想包庇同黨嘅政棍！

原圖：RTHK