遊行人數呢家嘢，有時候真係好神奇，好似盲反派搞遊行咁，明明人數冇佢講咁多，但仍然可以「吹」到幾多萬人參加，製造「萬人空巷、氣勢磅礡」嘅感覺，真係勁呀！（曲線）日前日前咁，盲反派又搞遊行喇，聲稱要「反威權」、「反政治檢控」喎，警方指遊行高逢期有4,300人參加遊行，但盲反派就聲稱有4萬人參與遊行，同警方公布數字差唔多爭成十倍！到底盲反派果4萬人係點計出嚟？科唔科學化？會唔會連行緊街嘅市民都計埋一份先？

「吹大」人數 所為何事？

平時嘅遊行、示威活動，基本上警方都會統計參與人數，警方嘅統計方法基本上屬於公開，遊行途中設多個點算站，每個站由一名警官率領五至六名警員負責，會輪流不斷以每十人經過便按一下計算器方法去統計人數，近年都係用同一統計方法，而且數據統統要存檔紀錄，無必要亦唔可以「老作」。警方統計嘅人數，每每同學術機構嘅數字非常接近。相反，盲反派次次遊行，就算媒體觀察到遊行人數唔算多都好，佢哋下下都公布遊行人數以萬甚至以十萬計，囍雨真係想問下，盲反派到底用咩準則去計算遊行人數，係目測？定係靠估？定還是係想幾多人參加遊行，就公布幾多人參加遊行？會唔會連喺銅鑼灣行緊街嘅人都計算在內，所以「要幾多人，有幾多人」？

囍雨認為，無論係出於自保或者政治計算，盲反派都一定會將遊行人數「吹大」，以佢哋所謂嘅「反威權」遊行為例，如果話畀市民聽得幾千人參加，等同承認佢哋嘅遊行主題無號召力；所以為咗保持政治道德「高度」，「吹大」人數，令市民錯覺有好多人支持佢哋。另一個考量，就係籌款問題，如果現場「門堪羅雀」、氣氛慘淡，分分鐘會影響埋現場同其他渠道嘅籌款進度，所以唔「吹大」啲、Keep住人氣，又點繼續籌款呢？

市民不支持違法行動 遊行慘淡

以平時盲反派搞開嘅遊行作參考，佢哋十幾廿個團體搞親遊行好多時最少都有一萬人甚至幾萬人參加，點解今次得4300人咁少？囍雨覺得當中因由好簡單，就係無論DQ四議員好、「雙學三人」案甚至「反新界東北」案也好，心清眼亮嘅市民幾乎都睇清楚係呢班人違法在先，政府依法執法，根本就唔係咩「威權統治」。諗深一層，如果盲反派人士違法而被告就係「威權統治」，唔通要任得盲反派「為所欲為」，先叫有法治？

原圖：hd.stheadline