旺角暴動發生近兩年，唔少被告都陸續被告上法庭，罪名成立嘅基本上都難免要入獄，囍雨記得有個涉及埋縱火嘅被告，仲被判監4月9個月。當參與旺角暴動嘅被告統統都被重判，作為策劃者嘅本土民主前線黃台仰，近日開始改口，話自己當日「太天真」，仲話自己之前都有啲擔心同驚，仲出現啲抑鬱添，老實講，一向勇猛嘅黃台仰，突然咁講，囍雨唔知信唔信好？黃台仰係「真悔改」，定係扮有錯嘅權宜之計？

轉仇恨為宣揚暴力抗爭？

根據傳媒報道，黃台仰向傳媒承認自己之前「天真地」發起行動，仲搞到自己有啲抑鬱，但囍雨感受唔到佢有悔意，因為佢仲話要將仇恨、憤怒等轉化為動力，例如去進修、宣揚「抗爭理念」等。表面上，黃台仰就好似扮到自己有做錯咁，但佢喺另一方面又話自己要繼續宣揚「抗爭理念」，咁佢所謂嘅「抗爭理念」，係指咩呢？佢之前一直支持「暴力抗爭」、「勇武抗爭」、支持「港獨」，係會繼續下去？唔該黃台仰講清楚！

事實上，連同黃台仰同梁天琦，旺角暴動共約有31名被告被控暴動罪，而喺已判刑嘅案件裡面，有3人被判監3年，一個因為暴動兼縱火被判監4年9個月；黃台仰或者梁天琦一個「天真」作出嘅決定，搞到咁多人陪佢哋犯法繼而入獄，黃台仰作為策劃者，連佢自己都驚要坐監，何必要繼續宣揚「抗爭理念」呢？而喺其他人被告上法庭審判前後，黃台仰、梁天琦都好似無向佢哋作出支援，如果激進本土派仲要聽佢哋指揮，真係太天真、太傻喇。

繼續衝擊、宣獨 必禍及社會

當黃台仰自己都唔敢承擔違法責任嘅時候，難道其他人就要慷慨「就義」？黃台仰自己都驚坐監，仲好意思叫人去衝？呢班盲反派成日講「違法達義」，其實「講就容易」，到要「找數」嘅時候，個個都「走數」啦！

原圖：crntt