近期本港大學校園出現「港獨」宣傳品風波，中文大學校園出現宣示「香港獨立」嘅橫額以及宣傳品之後，其餘大學紛紛出現支持「港獨」嘅宣傳品。囍雨今日上網，睇到中大學生會終於拆咗有關橫額，不過就唔係因為「港獨」橫額有違《基本法》，而係因為有關橫額無經過申請程序，又未經申請佔用空間，所以先將佢拆除。中大學生會似乎仲要喺度逞強，話校方「政治審查」、「打壓自由」等等，囍雨又係要講果句，言論自由唔係大晒，身份係學生亦唔代表可以為所慾為囉！

「港獨」有違《基本法》毋容置疑

根據中大學生會嘅聲明，佢哋喺拆除橫額嘅同時，都非常用力地攻擊中大校方，其中一個理由就係話校方雙重標準，有「反23條立法」橫額唔拆，就一定要佢哋拆咗「港獨」橫額。囍雨就相當有疑問，《基本法》第23條係叫港府應自行立法反對叛國等行為，對於「應該自行立法」嘅條文，市民係咪可以反對當然可以斟酌啦；但「港獨」所違反嘅直頭係《基本法》第一條所寫「香港特別行政區是中華人民共和國不可分離的部分」嘅總則，掛「港獨」橫額咁明顯違反《基本法》嘅行為，學校唔係唔駛阻止呀？

至於中大學生會話現行刑事法冇清晰明確條文限制「港獨」言論嘅說法，囍雨同樣相當之有保留，事關《刑事罪行條例》第9條、第10條，都有關於「煽動罪」、「發表煽動文字」、「展示煽動刊物」等犯罪行為，條文係咪肯定已經唔適用呢？囍雨就未必喇，檢控部門今日無引用條例控告「港獨」人士，其實唔代表以後都一定唔會囉！

言論自由有底線

其實嚟嚟去去，中大學生會以至其他宣揚「港獨」人士都係一樣，攞言論自由嚟做擋箭牌，講到有言論自由就講乜都得咁，引用佢哋最鍾意嘅國際標準，其實《公民權利和政治權利國際公約》，都寫到明人人有自由表意見嘅權利，但都有限制，例如要喺保障國家安全、公共秩序嘅前提之上，中大學生會班學生哥認為言論自由係大晒，甚至可以唔理國家安全？點講都好啦，大學生係有言論自由，但如果放任、無節制地行使言論自由而墮入法網，到時就係真係後悔都嚟唔切喇！

原圖：stheadline