「雙學三人」因為刑期覆核畀上訴庭判處即時入獄六至八個月，盲反派日日開恆喇叭話呢啲係「政治打壓」、「政治審訊」等等，歪理多多搞到大律師公會、律師會都發聯合聲明撐律政司同法庭判決。喺呢個意見紛陳嘅時候，連前港督彭定康都「加兩腳」，撰文話「三人」受到迫害。

近日彭定康又改口風，接受專訪話「三人」並非政治犯，但律政司司長覆核刑期就係政治決定。被告唔係政治犯，但提出刑期覆核係政治決定，彭定康呢個講法有冇矛盾？彭定康不時干預香港內政、法治，係咪燃燒緊自己光環呢？

彭定康的搬龍門出神入化

根據彭定康嘅講法，因為香港司法制度未被政治化，所以佢唔認為「雙學三人」係政治犯，但質疑律政司司長作為政治任命官員，提出刑期覆核係咪有政治智慧。老實講，囍雨就唔係好明白彭定康嘅邏輯，如果違法者由被告、被判到刑期覆核都係符合法治精神嘅法律程序，而「三人」喺原訟庭判刑明顯過輕，律政司司長以法論法，點解一定係政治決定呢？唔係政治任命官員，先應該作出艱難但正確嘅決定咩？

換個角度，如果原訟庭判刑明顯過輕，而律政司因為盲反派壓力而唔提出覆核刑期，囍雨就覺得咁先係政治決定喇！況且，如果律政司司長唔駛做法定，咁要個律政司司長嚟做咩？囍雨唔知道「三人」案係咪由律政司司長袁國強做最後決定，但必須強調就算真係袁國強做法定，呢個點睇都係法律問題，多於政治問題，囍雨唔知道彭定康有冇睇判詞，如果佢有睇，就應該知道點解判「三人」社會服務令唔合適。事實上，前刑事檢控專員江樂士亦指出，彭定康最清楚回歸前後的檢控制度沒有變，政治檢控說法損害香港法治。

助盲反派指鹿為馬居心叵測

彭定康近年屢屢評論香港時政，甚至不惜為「港獨」份子話大學校長唔應該喺校園「禁獨」，囍雨唔知點解彭定康要咁高調，係佢政治慾強，抑係想喺香港延續勢力，真係佢自己先知。不過，囍雨好肯定彭定康如果繼續喺度「指手劃腳」，為盲反派「指鹿為馬」，唔駛好耐就會燃燒晒自己嘅道德光環，到時會唔會好似前政務司司長陳方安生畀人叫「民主阿婆」咁叫佢「民主阿伯」，真係好難講喇！

原圖：Takungpao