囍雨讀得書少，對於學富五車嘅學者一向好尊重。但係自從有個叫戴耀廷嘅「法律學者」出嚟呼籲人犯法後，囍雨對「學者」兩個字就好有戒心，亦終於明白呢個世界真係有「壞」學者架。今日睇報紙，見到另一個囍雨心中極之不屑嘅「學者」，即係同樣有份發起「違法佔領」嗰個中大社會學學者陳健民呢，竟然唔認同老師會灌輸錯誤想法畀學生喎，真係聽到都嚇一跳囉！

屈穎妍比喻正確

話說喺日前嘅「踢走戴耀廷」集會上面，知名專欄作家屈穎妍獲邀上台發言，佢用之前搞到軒然大波嘅鉛水事件比喻戴耀廷，話佢同鉛水喉管一模一樣，將有毒鉛水不斷貫入學生個腦裡面，質疑既然當日反對派都要求全面驗水同拆除喉管，點解今日唔需要用同一方法革走戴耀廷咁話。

屈穎妍比喻合情合理，咁身為戴耀廷同路人嘅陳健民又點講呢？佢首先當然係質疑呢種比喻啦，繼而就反問如果比喻正確，咁點解自己昔日嘅學生、工聯會前立法會議員鄧家彪當日又冇去參加「違法佔領」呢，鄧家彪都算飲過「鉛水」咁話喎。

播毒害人 無視對學生影響

嗱嗱嗱，呢啲咪就係無賴囉。同其他盲反派一樣，陳健民最叻就係東拉西扯，面對人哋質疑時就東拉西扯、永遠唔會正面回答問題；點解囍雨話屈穎妍比喻正確呢？因為鉛水嘅特性就係，未必人人飲過就一定出事、就算出事亦係慢性，而且一出事就大大件事吖嘛！仲有，鉛水對小朋友同孕婦嘅影響會較大，有機會影響發展同成長，所以當日政府咪要即刻換喉囉！

咁仲唔係講緊你班喺校園播毒嘅盲反派？陳健民舉鄧家彪做例子，係囉，好彩鄧家彪身體好，頂得住你班人啲毒，所以佢今日咪可以站喺「反港獨」、「反佔領」嘅最前線囉！你陳健民仲好意思問點解毒佢唔到？你到底有冇少少羞恥之心呀？

不知羞恥 枉為人師

講到底，香港學生唔係人人好似鄧家彪咁好彩，可以頂得住你班人啲毒素架！你陳健民睜大眼睇清楚今日大學班所謂學生領袖發生乜事啦，個個都只係識暴力，同你同屬中大嗰個學生會前會長周竪峰呀，鬧內地同學時不斷講「支那」同「粗口」，成隻喪屍咁，除咗侮辱人之外就講唔出其他道理，呢啲仲唔係中毒？陳健民，你好心就反省吓啦。

圖片來源：天下雜誌