早前被「DQ議席」嘅前九龍西立法會議員劉小麗，決定正式上訴，希望推翻法院嘅決定。上訴係市民基本權利，大家當然唔會質疑佢，問題係因為佢上訴，結果令到選舉管理委員會唔可以安排佢個懸空議席，喺明年三月同游蕙禎嗰個一齊補選，九龍西兩個空缺，隨時只可以補一個。本來基於法治原則，大家都應該尊重呢個情況，但偏偏劉小麗原來積極考慮緊參加三月補選，咁就唔同講法喇！

劉小麗全無「法治意識」

九龍西兩個懸空議席，分別來自劉小麗同「青年新政」游蕙禎，佢兩個因為「宣誓玩嘢」，違反《基本法》同《宣誓及聲明條例》，結果被褫奪議席。游蕙禎遺下嗰個議席，已經完晒法律程序，補選勢在必行；至於劉小麗，由於佢已經申請上訴，即係法律程序未完成晒，咁佢個議席補選等吓先再補，咁都合理吖，大家唔可以排除佢上訴得直吖嘛。

原本劉小麗安安份份專心上訴，冇乜人可以質疑佢，但佢同時話「積極考慮」參加明年三月補選、競逐游蕙禎嗰個議席，成件事就好唔同喇。假設時間上唔會出現衝突，最差情況係劉小麗勝出明年三月個補選，但同時又上訴成功，咁佢即係有兩個議席啦，理論上佢必須辭去其中一個議席，咁到時咪又要搞補選？傻的嗎？

口稱為弱勢 實則為自己

仲有，劉小麗一邊上於九龍西議席、另一邊廂又參加九龍西另一個議席補選，咁擺明就係唔尊重法治、唔尊重法庭啫！因為法治，佢先有資格上訴，而家竟然玩「兩手準備」，希望買多重保險保住自己立法會議員個位，點講都係，都係完全漠視法治意識、毫無政治道德嘅行為！冇法治意識、冇道德操守，呢啲人仲有咩資格做代議士呀？唔好玩啦！

劉小麗打咩算盤，囍雨唔想揣測，有人話佢上訴只係「做吓樣」，好快就會放棄上訴，全港市民唔會知係真定假，但大家肯定知道係，補選一次，至少會浪費七千萬公帑，劉小麗口口聲聲為弱勢同基層出聲，但講到自己利益時，就完全唔理會自己可能會大量浪費公帑，七千萬呀，可以幫到幾多個飯盒畀基層市民呀？當佢五十蚊一個，都足足買到一百四十萬個啦！劉小麗，你真係仲好意思耍埋呢啲小手段？卑鄙囉，冇嘢嘅。

圖片來源：文匯報