香港傳媒嘅公信力，喺市民心目中屢見新低，呢個已經係不爭嘅事實。就好似舊年發表嘅研究咁，市民對整體香港新聞界評分只有5.89分（滿分為10分），較2009年、2010年同2013年嘅同類調查都要低，而且係拾級而下。點解香港傳媒公信力會咁低呢？囍雨自己都諗咗好耐，直到今日睇到一條新聞之後終於明白，出現呢種情況，相信同個別香港傳媒政治取態過度明顯有關。

英國認同「一國兩制」運作良好

囍雨睇到嘅新聞，係關於英國政府向自己國會提交《中英聯合聲明》喺香港實施嘅最新一期半年報告書。唔好以為英國政府一定唱衰香港喎，唔一定架，英國外交大臣約翰遜喺報告書劈頭就講「香港回歸廿年取得重大成就，可見一國兩制自回歸以來整體運作良好」，但佢亦同時提醒「不能忽視一國兩制框架下重要範疇正面臨愈來愈大壓力」。

姑勿論約翰遜嘅睇法公唔公道都好，有一點係唔可以忽視嘅，就係佢都認同，「一國兩制自回歸以來整體運作良好」，呢個可以話係報告嘅主旨，對整份報告有一錘定音嘅效果，意思係就算報告之後提出其他意見都好，亦唔影響「一國兩制整體運作良好」呢個結論。

報章報憂不報喜？

雖然，外國政府唔應該干預香港事務，但有外國政務認同「一國兩制」喺香港嘅成就，都值得高興一下嘅。之但係啲報章處理呢單新聞時又點睇呢，好似某份曾經自稱「公信第一」嘅報紙咁，報道呢單新聞時就以〈英《聯合聲明》報告書：港重要範疇壓力趨增〉為題，嘩，真係一個唔小心做咗標題黨嘅話，真係以為英國又鬧中央政府同香港特區政府添。

另一方反中立場明確兼出名偏頗嘅《爛果報》又點呢？報道同一單新聞，條題就變成〈英報告：港一國兩制受重壓〉，真係唔知就畀佢嚇死、知就畀佢笑死。係，兩份報章都有編輯自主，起條題亦係事實一部份，但唔夠全面囉，唔知係唔係版面唔夠呢？

千萬別做標題黨

囍雨唔敢話上述兩份報章呢單新聞嘅報道內容失實，因為佢哋內文都有寫出英國外相認同「一國兩制整體運作良好」嘅事實，今次寫出嚟只係想讀者要多多注意，要做個聰明香港人，千祈唔好齋做標題黨，睇任何新聞都一定要睇晒全部內容，甚至花少少時間睇多幾份，咁先唔會「畀人FAKE」到。切記呀！