前任特首梁振英卸任後，政圈早知道佢會以國家領導人身份，參與「一帶一路」同「大灣區」兩項重要國策嘅工作。近日就有傳媒報道，指梁振英成為兩間公司嘅董事，消息一出，以「爛果報」為首嘅不良傳媒，即時營造梁振英會藉呢兩個公司「CAP水」嘅印象，就算官方已經澄清梁振英唔會受薪、唔會分紅、公司唔會涉及商業運作同專業服務都好，亦繼續玩誤導兼人格謀殺，認真無賴！

冇人工、冇分紅、冇商業運作 何來衝突？

前任特首辦以及特首辦兩個單位，尋晚已經先後回應，重申梁振英出任董事嘅兩間公司，即係「一帶一路國際合作香港中心有限公司」同「大灣區香港中心有限公司」，兩者都係「非牟利組織」，不會參與商業或專業服務，而梁振英本人亦冇人工、冇分紅，而兩間公司嘅活動亦會按政府規定而運作。

換而言之，話梁振英做兩間公司董事會有利益衝突，呢項指控完全唔成立。不過啲不良傳媒又點肯放手吖，話鋒一轉就指控梁振英冇跟政府規定申報，一直等到傳媒報道事件先急急補鑊補返申報喎。

官方指引 只須「通知」 不須「申報」

實情係點？囍雨翻查政府〈為避免利益衝突而設的前任行政長官離職後工作規限〉，指引清楚列明，前任行政長官如果接受慈善、學術或其他非牟利機構委任，其實係毋須徵詢「前任行政長官及政治委任官員離職後工作諮詢委員會」意見架！另外，指引亦講明，如果前任行政長官如接受慈善、學術或其他非牟利機構的委任，只係需要「通知」政府，而唔係「事先申報」，當中更冇列明「通知」日期添。

刻意忽略事實 涉人格謀殺

呢份指引，一早已經放喺行政長官官方網站上，全世界人都可以下載，偏偏呢啲所謂傳媒，連查證都唔想做、刻意唔做，結果就係故布疑陣，搞到梁振英好似有古惑咁。呢啲咁嘅傳媒，連基本道德操守都唔顧，剩係識「炒作」，講到尾咪又係要人格謀殺梁振英！好離譜囉。