囍雨噚日喺社交網站見到條片，見到中大前學生會會長周豎峰喺度鬧內地學生係「支那人」、夾雜粗口咁叫佢返回內哋，仲好似想衝埋去打對方咁款，好彩周邊嘅人見到周豎峰咁癲，都忍唔住要拉開周豎峰。其實周豎峰用「支那」去侮辱人，佢有冇諗過，佢係侮辱埋自己、自己父母，甚至係其他華人呢？中大見到呢個情況，係咪要嚴懲佢先？

睇到呢條片，就令囍雨諗起好耐之前，當時仲係特首嘅曾蔭權喺立法會話過黃毓民係爛仔，仲話「呢度唔係黑社會」。當時好多人聽到呢番說話，都覺得有啲議員雖然言行過咗火位，但都未至於係「黑社會」嘅；不過今時今日，囍雨覺得個別激進議員好、大學生又好，言行舉止真係越嚟越似「黑社會」，試問邊有正常大學生之間嘅討論，搞到想打人、恐嚇人咁款呢？周豎峰作為前學生會會長，假假哋都曾經係學生代表，估唔到竟然會做啲咁嘅事。上年有立法會參選人被取消資格，周豎峰就曾經話過「以武裝力量重奪我哋嘅未來」，原來呢個一年前思想暴力嘅學生代表，實際行動嘅時候都係一樣咁暴力嘅！

周豎峰故意以「支那」侮辱人

對方內地生因為反「港獨」先挺身而出，周豎峰本人係咪支持「港獨」就暫時未肯定，但佢不斷用「支那」嚟侮辱其他人，稍有歷史知識嘅人都知道，「支那」係19、20世紀初其他國家例如日本用嚟形容中國、中國人嘅貶義詞，帶有輕蔑嘅意味；加上戰爭嘅歷史，呢個字對華人嚟講既侮辱又會勾起充滿屈辱嘅過去，周豎峰唔係唔知呀？經過梁頌恆、游蕙禎宣誓時用「支那」侮辱華人一事，正常人都應該知道呢個詞帶有侮辱性，絕對唔應該用嚟話人。囍雨都幾肯定，周豎峰係刻意用呢個詞去侮辱人，不過佢咁講，其實係侮辱自己、自己家人同埋其他華人（除非佢根本唔係華人喇！）。

違背中大理念必須嚴肅看待

掛港獨標語橫額一事，中大校長同管理層左閃右避話咩「言論自由」，同教育大學校長張仁良嚴厲譴責學生貼標語奚落蔡若蓮副局長喪子嘅事相比，正好反映出張校長有擔當、能面對學生犯錯。中文大學作為一間相當重視中華文化嘅大學，係香港少數用中英雙語教學嘅大學；周豎峰作為中文大學學生，甚至前學生會會長，竟公然侮辱華人，會唔會連學校嘅宗旨都離棄埋先？中大出現侮辱華人嘅前學生代表，中大絕對有義務、責任嚴正看待，千祈唔好玩「和稀泥」，對周豎峰呢啲行為「視而不見」！

原圖：網上影片截圖