「雙學三人」因為2014年衝擊政總被判入獄，明明講好「公民抗命」會承擔罪責，但到咗「找數」嘅時候就個個都唔認數，唔認罪之餘仲要老屈政府「政治檢控」，甚至話自己係「政治犯」、「良心犯」。噚日，囍雨睇電視見到「違法佔領」發起人陳健民受訪，話上訴庭處理「雙學三人」案時懷疑「非暴力」初衷令人失望，又話唔同意一次「公民抗命」會令守法觀念崩潰，仲讚黃之鋒等人係一代人典範云云。其實，陳健民好、黃之鋒好，佢哋根本唔係搞「公民抗命」，呢班人只係一般違法或涉嫌違法人士，口中所謂「初衷」，根本從冇實現過！

「勿忘初衷」只是口號

記得戴耀廷以至陳健民等人宣揚「違法佔領」概念時，講到明所作所為一定係「非暴力」，仲話要「勿忘初衷」，永遠要記住點解要企出嚟，同埋會堅守底線等等。但係，眾所周知，佢哋所謂嘅「初衷」根本從來都無實現，衝擊政總東翼前地以至係「違法佔領」絕對唔係「和平、理性、非暴力」，佢哋到今日依然口口聲聲話自己行為係「公民抗命」，根本就係呃人。

好似長達79日、嚴重影響市民生活、生計嘅「違法佔領」，基本上由第一日開始，戴耀廷、陳健民以至黃之鋒等人根本就控制唔到局面，「違法佔領」期間一幕幕暴力衝擊不斷發生，有示威者用自制武器不斷攻擊警方，甚至出現過幾百個示威者圍住幾個警員要「搶犯」，仲有金鐘海富中心襲擊休班警呢？唔通呢啲帶有暴力成份嘅行動，符合「公民抗命」嘅非暴力原則咩？陳健民係唔承認呢啲係暴力，定係佢連自己心眼都蒙蔽埋，話畀自己知呢啲唔算係暴力呀？

不承擔罪責的「抗命」

除咗非暴力，「公民抗命」有一個重要元素，或者公民抗命嘅最後一步就係要承擔罪責，當陳健民讚揚「雙學三人」面對法庭審判時候嘅表現，陳健民敢唔敢講，「雙學三人」唔認罪、唔認錯，根本算唔上「公民抗命」？陳健民梗係唔會咁講啦，因為除咗「雙學三人」唔想認數，因為發起「違法佔領」而被告《煽惑公眾妨擾》等罪行嘅佢，其實亦講到明唔會認罪，即係「必定走數」。

陳健民今日為「雙學三人」辯護，囍雨覺得好諷刺，到底呢班人仲有咩資格講「公民抗命」？又有咩資格話自己係「政治犯」、「良心犯」？為咗個人政治利益，故意向公眾散播不實訊息，呢啲只係「假公義」，並唔係「真民主」囉！

原圖：hket