青年新政梁頌恆、游蕙禎因為喺立法會宣誓時拒絕／忽略誓言畀法院取消議員資格，二人不服判決上訴，近日連終審法院都拒絕二人上訴申請許可，即二人終極敗訴，鐵定失去議員資格。今日終審法院頒下判詞，一直關心梁、游案嘅囍雨好奇下載份判詞睇下，見到梁、游原來仲未認錯，甚至喺提出上訴許可嘅時候質疑法例冇寫明宣誓方式，梁、游到底係賴皮賴到底，定係佢哋連自己都呃埋，覺得自己完全冇錯呢？

宣誓方式清清楚楚冇抵賴

綜觀今次梁、游申請上訴許可而提出嘅問題，主要有三方面，第一係關於立法會嘅不干預原則，第二係係對於《宣誓及聲明條例》第21條理解，第三就係關人大常委會對《基本法》嘅解釋。關於立法會嘅不干預原則，囍雨就唔多講喇，因為《基本法》作為香港嘅「小憲法」，法庭絕對有責任維護有關法律，以及做最終裁決者；至於人大常委會釋法，囍雨都覺得毋須多解釋，因為法庭都講到明就算無釋法都會DQ梁、游。囍雨睇到梁、游最大嘅謬論，主要係關於第二點，即係有關對於《宣誓及聲明條例》第21條嘅理解。

等於自己放棄席位

梁、游點樣拒絕／忽略誓言，同埋宣誓嘅時候點樣玩嘢，相信都唔需要囍雨再重複，二人對於《宣誓及聲明條例》有所質疑，梁頌恆認為就算拒絕/忽略誓言要離任前，係咪都有酌情權或者有再次宣誓嘅機會，而游蕙禎更質疑法例冇文明規定宣誓行為或者方式。嗱，囍雨唔知游蕙禎係咪對中文嘅理解唔係好好，宣誓「行為」囍雨先唔評論，佢同梁頌恆宣誓果時將誓詞內容改晒，平常人都知冇可能符合到《條例》寫明嘅指定格式啦，佢仲好意思質疑相關法例？佢唔係覺得改誓詞然後動作多多都係冇問題下？宣個誓都唔做，等於放棄議員席位！

另一個問題，就係游蕙禎質疑裁定立法會議員宣誓有冇效時，係咪都應該考慮其宣誓係咪莊重、有冇誠意；囍雨覺得游蕙禎講得出呢番說話，無「十級無恥」都起碼有「八級」，將「China」讀成「Geen-na」（支那），又將「Republic」讀成「Ref__king」（粗言恕未能盡錄），佢唔係覺徥自己好莊重、好有誠意呀？其實講到尾，二人連喺法庭到認錯，要求法庭畀次機會嘅道德勇氣都冇，根本就冇資格做代議士！如果佢哋覺得自己係民選議員可以大晒，法庭判決正好話畀佢哋聽，議員喺法律前都冇特權，都要守法！

原圖：stheadline