「雙學三人」被判囚，反對派紛紛行出嚟護航，話「三人」係「政治犯」、「良心犯」，講到有政治理想就做乜都無罪咁款。囍雨今日睇報紙，見到公民黨前立法會議員陳家洛都衝出嚟亂吹，話政府否定有「政治犯」，唔代表「政治犯」唔存在，而佢引用嘅「理據」，竟然只係辭典裡面一個簡單嘅解釋！作為大學副教授，仲要係教政治相關科目，陳家洛有學術著作唔引用，竟然用辭典，點睇都好似兒戲咗啲喎！

扭曲「政治犯」定義

陳家洛作為學者，喺討論「政治犯」問題時總算走啱咗第一步，就係先對「政治犯」呢個字做一個定義；不過，佢嘅所謂定義真係好兒戲，拎住「牛津」同「劍橋」兩本辭典，然後就得出「因為政見和政治行為而入獄服刑的人」就係「政治犯」，真係低能到痺。老老實實，唔使讀過政治學都會知，兩本辭典對「政治犯」嘅定義過份簡單，既無講清楚咩係「政治行為」，亦冇清楚說明如果因為政治理念而破壞到社會秩序，甚至傷害到其他人又點計，作為學者，陳家洛真的只有這種水平？

陳家洛咁想分析「政治犯」概念的話，囍雨又用自己非常粗淺嘅見解去反問陳家洛：一）香港法院係唔係獨立審判、司法獨唔獨立、「雙學三人」審訊期間有冇得到法律保障？二）律政司控罪同案情符唔符合？有冇羅織罪名呀？三）「雙學三人」又好、新界東北衝擊案又好，兩單案件有冇牽涉暴力？上述三條問題答案都「否定」嘅，陳家洛先好話香港有「政治犯」囉！

「雙學三人」，以政治為由，衝擊政府總部，過程令到10名保安因此而受傷，其中更有人骨折；囍雨真心想請教陳家洛，如果佢覺得「因政見或者政治行為」而入獄就叫「政治犯」，若暴力衝擊、傷人係「政治行為」，咁係咪只要聲稱行為係「政治行為」，就可以做乜都得呢？打劫得唔得？殺人放火得唔得？陳家洛呢種簡單定義，根本就係侮辱本港嘅司法制度。

借「政治犯」合理化暴行

其實除咗陳家洛外，呢兩個星期唔少反對派都用盡方法為一眾被判即時入獄嘅施暴者塗脂抹粉，亂咁吹話香港有「政治犯」、「良心犯」，請到底都係想增加盲反派政治能量。老老實實，如果依法檢控佢哋都等於「政治檢控」，咁社會咪好容易進入戰爭狀態（State of War）囉？即係只要宣稱有政治目的，傷害他人都可以在所不計，大家話幾危險呢？曾經叫過學生諗下如果有一日五星紅旗不再升起應該點做嘅陳家洛，似乎好樂意見到香港社會越來越亂，真係好鬼黑心囉！

原圖：RTHK