尋日公布新成立嘅「土地供應專責小組」成員名單，在一般市民睇嚟，成員來自社會不同階層、專業同立場，部份支持發展、部份支持保育，將來物色土地時，相信可以兼顧各方意見。不過一如既往，盲反派對於特區政府嘅一切都只會持「反對」態度，一味挑挑剔剔，總之就係話成員背景唔全面，擔心立場過於「強硬」等等。講真吖，香港房屋土地不足問題，點可能一個方法解決晒，社會一定要有取捨，專責小組而家都未開始辯論，盲反派就阻住晒，咁點解決問題先？

盲反派反射性反對

成員名單，今日傳媒已經報道咗唔少喇，囍雨唯一唔明嘅係，呢班履歷同經驗都相當完整嘅成員，到底以往做過啲乜，令到班盲反派咁大批評呢？好似「本土研究社」陳劍青咁，佢話喎，部分成員曾經提出填平船灣淡水湖等「具爭議」言論，成員中又有鄉事派，令人擔心小組傾向某些持份者，質疑小組唔可以凝聚社會共識，反而會激化社會矛盾咁話。

陳劍青所批評嘅，相信就係港大房地產及建設系講座教授鄒廣榮，以及鄉議局副主席張學明。冇錯，鄒廣榮的確提出過要填平船灣淡水湖去建屋，但陳劍青到底有冇去了解為何有呢個建議呢？原因咪就係因為香港土地唔夠，鄒教授成個團隊認為，「填海」係香港增闢新土地最有效方法，仲指出填咗船灣淡水湖，亦有辦法唔影響食水供應。人哋身為學者，有晒研究有數據，試問有咩問題？

鄉事派乃土地重要持份者

至於搵鄉事派領導加入小組，其實亦係必要之舉。今日香港如果要開發新土地，鄉郊同新界地區幾乎都係首選，香港島同九龍，已經好難再搵到大型而且可供發展嘅地皮，如果要向新界土地埋首，喺政治同法律現實下，都一定要得到鄉事派理解同支持，否則就好難成事，咁喺物色土地過程中聽聽鄉事派意見，咁又有何問題呢？仲有喎，成個小組廿幾人，都係得一個鄉事派啫，陳劍青使唔使即刻反面呀？

仲有，真係唔講嗰句都講埋，鄒廣榮所持立場其實同陳劍青未必差好遠，佢都唔同意發展郊野公園邊陲生態價值較低嘅土地架，只不過佢支持填海嘛，人哋鄒教授呢啲叫做理性，佢唔同意某一方案，唔係問題呀，佢肯提出、接受另一啲有爭議性嘅方案，呢個咪係解決土地供應不足問題之道囉，唔通要好似陳劍青，甚至係立法會議員朱凱迪咁，事事都盲反，乜都反對咗先可以解決問題咩！

求同存異 一人行一步

講到底，土地供應不足，始終係今日香港最大嘅民生問題，好老土咁講，要徹底解決，一定要多管齊下、種種方法都去諗，唔可以死抱一、兩樣方案，而唔肯聽其他人意見。香港一直以來咁成功，正因為大部份人都做到求同存異，一人行一步，嗰啲激進反對團體，唔該唔好再盲反，切實一啲提供可行建議畀香港啦！

圖片來源：團結香港基金會