去年年初發生旺角暴動，其中一名被控暴動罪嘅十八歲女被告李倩怡「棄保潛逃」，去到台灣尋求台獨組織嘅政治庇護。近日網上流傳一段疑似由李倩怡錄製、公開嘅錄音，話自己得到台獨派嘅幫助，「流亡」係因為自己「唔再相信香港有法治」，形容自己被控係「政治檢控」。如果呢段錄音真係由李倩怡錄製，囍雨真係好想同佢講，你唔係因為政治而被檢控，而係因為你涉嫌違法、參與暴動被檢控，唔好再用抹黑司法嘅手段掩飾自己嘅暴行！

潛逃只因心虛？

李倩怡同其他旺角暴動參與者一樣，以「魚蛋革命」形容旺角暴動事件，囍雨唔想再去拗點樣去稱呼呢場暴動，只希望大家唔好混淆，參與旺暴嘅人，就算因為政治理由而走出嚟都好，佢哋每一個都唔係因為政治理由而被捕，更加唔係「政治犯」，因為佢哋參與咗一場導致好多警察受傷、公眾秩序受到破壞嘅暴動，所以先被「拉」、被「告」！

事情嘅重點只得一個，如果李倩怡自己無做過，香港法庭一定會還佢一個公道。香港法庭水平，得到國際公認，就算係旺角暴動案都好，其實亦有被告雖然行為可疑，但由於有疑點，所以上到法庭都一定被判無罪。李倩怡咁樣一走了之，除咗「心虛」，都諗唔到其他理由。再者，舉個極端少少嘅例子，他日若要有人喺香港犯咗其他罪行，好似殺人、放心、打劫、綁票等等，唔通一句話自己「唔信香港司法」就可以潛逃境外，仲要老屈番檢控部門轉頭咩？如果係咁，咁仲有天理嘅？

旺角暴動中逾80名警員受傷

「旺角暴動」，絕對唔只係一場示威行動咁簡單。事發當晚過百名暴徒手持各類武器，不斷向警員作出攻擊，有警員多次被暴徒擲出嘅雜物擊中，甚至有警員昏倒喺地上，啲暴徒都仲要繼續打，之後又有暴徒「掘磚」、「擲磚」，事件有超過80名警員受傷。呢啲涉及襲擊警察、燒車、破壞公物嘅罪行，試問同「政治檢控」有咩關係？一眾被告又點可能係「政治犯」？

正如大律師公會前主席譚允芝所言，「政治犯」應該係講緊唔同意執政者嘅人士，被蒙上唔相干嘅罪名，但李倩怡點睇都係一個徹頭徹尾嘅罪案嫌疑犯，佢被控《暴動罪》亦係合適罪名，香港嘅司法制度並唔會因為有人為政治理念而違法而「隻眼開、隻眼閉」，同樣亦唔會因為某人嘅政治立場而刻意判佢有罪！老老實實，如果有人示威時犯法、傷害到其他人而不受追究，咁先係嚴重傷害法治同司法制度呀。

原圖：網上圖片