法律學者戴耀廷近日喺報紙寫文，話特首梁振英連最基本既法律知識都無，無資格領導香港喎。不過囍雨睇番兩個人既說話，梁振英話唔會向以癱瘓中環為目的既行動發「不反對通知書」，因為咁係不可想像既，近日警隊「一哥」曾偉雄都有類似睇法，話如果個活動係違法，就不存在「審批」問題，即時獲得社會相當一致既讚許同掌聲。再睇番戴耀廷今日喺報紙講到違法「佔中」都可以攞「不反對通知書」既謬論，真係唔知好嬲定好笑，啲歪理連中學生都呃唔到啦，真係要問戴耀廷一句，作為一個法律學者，你識唔識法律架？

臨時辦公室唔係「損失」？

戴耀廷話佔領中環唔會對進出中環造成問題，有機構已經喺中環外設置臨時辦公室，質疑無造成其他實際損失又點民事索償喎！如果「佔中」班人真係佔領咗中環，令到要去中環既人用幾倍甚至十倍時間先去到中環，造成既經濟實質損失，唔可以民事索償？公司設置臨時辦公室，臨時辦公室都要錢架，對公司同機構嚟講，呢啲本來係冇必要既額外支持，乜呢啲唔係損失咩？

其實科大經濟教授雷鼎鳴已經講過啦，商人去中環設立辦公室一定有佢既經濟目的同考慮，如果唔係，中環租金咁貴，使鬼個個都仆住去咩？呢個咁顯淺既道理，戴耀廷冇理由唔識，只係唔開口講畀啲畀人呃咗去「佔中」既市民知啫。再講，如果講到「佔中」影響咁細，咁你班人「佔中」嚟把鬼呀？去佔領維園吖笨！如果唔係有巨大破壞力，你班人就唔會明知犯法都去「佔中」啦，係唔係咁講先？

「佔中」咁小事，咁你「佔」嚟做乜？

有膽做又喺度詭辯，戴耀廷已經去到一個理屈詞窮既地步。囍雨呼籲一眾「佔中」倡議人做返個有腰骨、有膊頭既人，堂堂正正咁同全港市民講：「係呀，佔中好大件件事架，會癱瘓中環、會影響香港經濟，參加者仲可能留案底，一生前途從前毀架！」如果你班人肯咁講，相信即使反對「佔中」既人亦會畀返幾分尊重你，不過而家呢？Sorry囉，我睇唔起你哋。

作為一個法律學者，混淆所謂法律知識已經唔啱，如果連修養都無埋，咁就真係枉稱係「學者」喇。畀佢帶隊佔領中環，真係好危險。戴耀廷質疑市民點解一定要去中環睇醫生，質疑又唔係得中環有醫生，如果警方封鎖中環，造成損失既就係警方咁話喎！戴耀廷可以非法佔領一個地方，然後批評受影響既市民，再將責任推畀維持秩序既警方，咁無良既說話都講得出口，戴耀廷，Shame on you囉！

呢個扭曲法律、老屈特首、譴責市民、陷害警方既戴耀廷，香港人真係仲要信佢？

原圖：takungpao