「雙學三人」因為衝擊政總被上訴庭判處即時監禁，反對派紛紛走出嚟攻擊政府、法庭，甚至連佢哋嘅法律界人士都唔尊重法庭判決，不斷進行攻訐。近日，有前學聯成員更加走到台灣同「台獨」勢力合流，攻擊香港司法部門。囍雨覺得，無論係本港嘅反對派人士以至「台獨」勢力，先至係破壞法治，如果因政治理念犯法而不受懲罰，咁法治又從何說起呢？

香港案件 與「台獨」人士何干

黃之鋒、羅冠聰同周永康被判入獄，事件由香港案件逐漸提升至國際層面，連前港督彭定康都為包庇「三人」而作出損害法治嘅言論，近日連「台獨」勢力都出手搞局喇。前學聯秘書長陳樹暉同香港眾志成員袁嘉蔚（羅冠聰女友）走到台灣尋求「台獨」團體聲援，同「島國前進」發起人林飛帆等開記者會，陳樹暉話「香港司法體制慢慢崩潰」，林飛帆就話中國透過「三權合作」打擊香港社會。

囍雨唔知道班「台獨」人士知唔知「三人」衝擊政總案係咩一回事，但有一點非常肯定嘅，就係「三人」絕對唔係因為政治理念而入獄，而係因為佢哋「非法集結」破壞到社會安寧、令保安受傷甚至造成財物損失先被定罪、入獄。不論係台灣或者香港嘅抗爭人士，成日口口聲聲話要抗爭、抗命，但如果抗爭係咪應該預咗要找數先？所謂「三權合作」論，根本只係一班人犯法又唔想承擔罪責，繼而諉過於政府、法庭嘅藉口！

與台灣「連線」 「港獨」味更濃

另一個質疑，係衝擊政總案喺香港發生，喺香港法庭審理，關班「台獨」份子咩事呢？佢哋合流係咪又想借機「播獨」先？當香港班本土派不斷聲稱自己唔係搞「港獨」，但不斷宣揚「自決」理念，又同「台獨」勢力合流嘅時候，囍雨真係質疑呢班人根本係借「自決」為命，搞「港獨」為實。喺黃之鋒、羅冠聰等未入獄之前，喺今年六6月受邀到台灣，支持「台獨」勢力嘅立委成立「台灣國會關注香港民主連線」，聲稱支持香港「民主化」，呢班本土派嘅「司馬昭之心」，可謂路人皆見。

今次「三人」入獄，佢哋同支持者唔單止無坦然承擔罪責，反而抹黑番政府同法院轉頭，佢哋所謂嘅「公民抗命」根本只係一個口號，一個煽動人違法嘅口號！

原圖：Takungpao