「雙學三人」因為衝擊政總畀上訴庭判處即時入獄，反對派空群而出批評政府甚至法庭，部份法律界人士甚至都「加幾腳」，死唱爛唱香港法治已死，講到呢啲劣行，又點會無港大法律學者戴耀廷份吖。繼早前推卸散播「違法達義」歪風嘅責任後，近兩日又寫咗篇關於「威權統治」嘅文章，大約意思話法庭判決「配合」威權政府等；一句到尾，戴耀廷就係要貶低法庭、法治，用謬論去證明違法冇問題啦！

檢控違法人士不是政治打壓

喺戴耀廷篇題為《威權下的法院》嘅文章，話有研究顯示，法庭喺裁決時愈能「配合」威權政府，更多政治敏感嘅案件就會送到法庭，將政治打壓成為常態云云；內文仲提到「威權政府」好多時唔駛直接干預法庭，只要令法官感覺到有可能面對政治報復等，就會頒布配合政府嘅裁決。嘩，戴耀廷你好卑鄙呀，竟然暗指香港法院唔係獨立運作、竟然侮辱香港法院冇司法獨立，身為法律學者竟然唔以舉世公認高質素嘅香港法院質素自豪，仲散播呢啲不實言論，絕對係十惡不赦！

戴耀廷用含沙射影嘅方式話香港法庭「或者」受到干預，請問佢有冇任何真憑實據？身為法律學者，應該清楚見到今次「雙學三人」案無論係提出檢控、覆核刑期、法庭判決以至審訊過程都符合法治精神，而呢套法律亦係沿襲自英國《普通法》；而家反對派對判決唔滿意，一係就攻訐律政司長長，一係就質疑法庭，乜佢哋選擇「違法達義」果時，唔係一早諗住要找數嘅咩？法院所作嘅獨立判決，結果唔合你心意，你就話法院「配合」政府，呢啲唔係「輸打贏要」係乜？

再者，香港並非「威權統治」，戴耀廷亦唔可以將「政治敏感」案件同有人刻意違法、衝擊政府甚至令到他人受傷嘅案件混為一談；如果有人因為批評政府施政以被「以言入罪」，囍雨會認為呢啲係「政治打壓」，但如果係有人嘅行為擺明犯法，仲要影響到其他人，檢控佢哋唔係咩「政治打壓」，而係法治嘅實現。

戴耀廷「其身不正」 沒資格講法治

說到底，普天之下，最沒資格講法治或者講「公民抗命」嘅，根本就係戴耀廷自己。「公民抗命」的最主要元素，除咗「非暴力」外，就係「甘心接受法律制裁」，藉以顯示自己真誠相信自己的信念；戴耀廷呢，佢早已表明唔會認罪，就算政府嘅控罪合適都係咁話，犯咗法又唔認罪，咁就完善法治呀？

再者，佢由始至終都只係承認一條非法集，但大佬呀，法律上你唔只犯呢條吖嘛，點解可以講價呢？咁係「公民抗命」咩？係完善法治咩？學大律師公會前主席石永泰話齋：「你做公民抗命我會expect（期望）你有胸襟，郁你不同的charge（控罪） 有什麼問題，這個包括戴耀廷，嘰嘰趷趷，現在仲話『你不應用這條（罪）郁我』，有得講價的嗎？」

戴耀廷今日抹黑法院「配合」政府，將法庭判決講做「政治打壓」，對於有控罪在身嘅佢而言，根本就係此地無銀，而且甚有向法院施壓嘅意味。由佢講法治？唔怪得話「法治」已死啦，如果「法治」係佢咁演繹的話，香港法治就真係乜都冇喇！

原圖：takungpao