「雙學」以及新界東北案共16個被告被判囚，特首林鄭月娥噚日回應事件，指出無論理想有幾崇高，都應該用合法方法爭取，亦唔應該影響他人權利，又表示自己作為母親，理解幾位母親嘅心情。林太一番說話苦口婆心，但喺動輒得咎嘅時代，仍然受到攻訐，周永康（其中一入獄者）父親噚晚主動致電電台，話林太舉錯例子，又叫林太唔好用母愛嚟增加自己嘅政治本錢。囍雨好疑惑，林太講「法治」你班人又唔受、用母親角度剖白又唔得，咁要點講先得呢？

父母親角度不應受質疑

囍雨明白，兒女因為違法抗爭而入獄，為人父母一定非常心痛；呢一刻，政府官員未必可以完全感受到被告父母嘅切膚之痛，但囍雨覺得林太用母親嘅角度表示理解，作為兩子之母，囍雨覺得真係正常過正常。老實講，如果係佢嘅兒子出咗問題，即係Touch Wood講因任何理由入獄，相信佢都一定有一番感受；一位母親，表示明白幾個被告母親嘅感受，乜真係咁都唔得？

況且，話林太藉此增加政治本錢嘅說法，其實一啲都唔公道。喺最近兩單刑期覆核案中，無論係黃之鋒、羅冠聰、周永康，抑或另一名違法衝擊者何潔泓嘅母親，都有透過不同途徑為子女發聲，雖然有啲言論，社會未必全部接受，但大家體諒為人父母嘅心情，亦不會有過多批評，咁唔通我哋又會話呢幾位父母係借此機會，為子女增加「政治本錢」咩？

唔可以呀，我哋唔可以、亦唔會咁做，因為呢個係人性，稍有人性，都唔會質疑另一位父母嘅愛子女之心！被告父母有同理心，林太一樣有，囍雨就唔相信，林太係落井下石或者乘機教訓班青年人。

違法佔領緊接衝擊政總案發生

至於周永康父親話林太舉錯例子，因為林太違法佔領時同羅冠聰、周永康佢哋對話、勸誡佢哋，囍雨認為其實無論任何時候勸誡青年唔好違法，都唔會話有錯；況且林太同羅冠聰佢哋對話果時，其實正正係有一宗案件發生緊，呢宗案件就係「違法佔領」。

當一件案（衝擊政總）發生後，又有「違法佔領」發生，林太喺果時勸學生要守法，再喺噚日重申多一次呢番說話，又有咩問題呢？可憐天下父母心，今次兩宗案件嘅被告父母有一顆父母心，林太身為特首、身為兩名兒子的媽媽，感同身受、苦口婆心勸導青年，試問有咩做錯？

原圖：gov.hk