「雙學」前領導黃之鋒、羅冠聰以及周永康被判監，大律師公會前主席石永泰接受專訪時指三人「求仁得仁」，入獄唔應該講到畀人政治控控或迫害，仲點名批評港大法律學者戴耀廷要負好大責任。石永泰一番說話可謂有理有據，但戴耀廷依然恬不知恥，話唔應該將所有責任推予抗爭者，仲話如果當初石永泰同佢一齊，相信聲音會更大，仲夠膽死反問石永泰係咪都有責任。一個煽動違法、推人去死嘅文痞，竟然反過來話唔鼓勵違法嘅人有責任，為咗卸責，戴耀廷仲有咩講唔出口呢？

說好的「和理非」呢？

眾所周知，自2013年年初起，戴耀廷就將「違法達義」嘅訊息日夜不停Loop，接受傳媒訪問啦、講座啦、入大學同中學講課啦，講到違法係「天經地義」嘅咁；當佢搬出「公民抗命」訊息嘅時候，的確有唔少都幾Buy佢果套，「用愛與和平佔領中環」，「和平、理性、非暴力」喎、犧牲喎，聽落幾有道德高地呀，結果呢？暴力衝擊畫面一個接一個。去到近日衝擊政總、反新界東北人士被判囚，戴耀廷就將責任推得一乾二淨，真係神乎其技。

強盜邏輯 違法者竟批人家不同流合污

講返石永泰嘅言論，批評非常之中。試問一句，今日社會部份群體間瀰漫住「違法達義」歪風，到底係邊個造成？戴耀廷惡行滔天，但佢回應批評時竟然話「如果當年石律師與我們在一起，我相信聲音可能更加大。他是否都有責任？」吓！一個推年輕人去死嘅戴耀廷，竟然將責任推畀唔肯同佢一齊鼓吹違法嘅人身上？咁好笑？

所以話，呢啲咪就係「強盜邏輯」囉。自己鼓吹犯法都算，仲話其他冇鼓吹違法嘅社會人士有錯，感覺就好似話「如果你當初同我哋一齊打劫，多啲人企出嚟一齊做，而家可能我哋得咗啦」；戴耀廷身為法律學者，理應知道唔應該煽動人犯法，如今佢連唔鼓吹違法嘅人都鬧埋，佢咁講係咪即係所有唔鼓吹「違法達義」嘅香港人都有錯先？

別人子女可犧牲？

眼前年青人相繼入獄，戴耀廷不但無動於衷，仲想諉過於人話唔參與違法行動嘅人先有問題。咁囍雨真係想問下戴耀廷，既然違法行動「多個人多一份力量」，咁佢幾個仔女當中有邊個參加「違法佔領」呢？定還是他人子女可犧牲，我的子女就免問呢？

原圖：RTHK