黃之鋒、羅冠聰同周永康等三個過氣學生領袖，因為參與同煽動他人參與2014年衝擊政府總部行動，結果被上訴庭判即時入獄6至8個月。上訴庭判決再一次指出，無論所謂理想有幾崇高，都唔能夠用犯法手段嚟破壞公共秩序同安寧。面對法院嘅判決，反對派當然大力反駁，而且謬論多多，但只要睇真啲判站，認為黃之鋒等三人唔使判監嘅理由完全站不住腳，入獄係唯一選項。

公民抗命 只是欺騙他人口號

反對派又不斷灌輸，黃之鋒佢哋衝入政總係「小事」，但大家唔好忘記，呢單案係有「暴力」成份，喺佢哋幾個號召下，幾百人即時衝入政府總部東翼前地，撞撞撞撞、推鐵馬等當然少不免，最終導致十個保安員受傷。面對暴力，法院判處具阻嚇力判刑絕對無可厚非，尤其三人係處心積慮違法，除咗參與，更係係煽動他人非法集結添。

反對派之所以係咁講唔同案件嘅被告都受到「重判」，其實都係建基於一個錯誤嘅前設，就係佢哋覺得只要有政治理由而犯法，法庭都會甚至必須輕判。率先公開散播「違法達義」歪理的「違法佔領」發起人戴耀廷，今日亦承認，初期冇預計過抗爭者要承擔咁重刑責；大家睇到啦，戴耀廷終於認「公民抗命，無畏無懼」係呃人架！

社會服務令前提為被告有悔意

至於點解社會服務令唔合適，上訴庭其實都有解釋，原來，「真誠悔意」係判處社會服務令嘅先決條件，三人面對明確、無可否認嘅證據依然拒絕認罪，所以之前判社會服務令係犯咗「原則性錯誤」。

至於話佢哋已完成社會服務令，而家入獄係「額外施刑」，呢種同樣係謬論。因為上訴庭已經考慮三人中，其中兩個完成咗社會服務令，所以已經額外減刑一個月，咁又點會係「額外施刑」呀？

囍雨喺度要重申多次，「公民抗命，無畏無懼」只係啲政客煽動青年走出嚟違法衝擊嘅政治宣傳口號，如果大家仲要信班反對派政客，囍雨都無話可說。至於唆擺佢哋嘅政客，而家繼續享受高薪厚祿好福利，真係非常諷刺！

圖片來源：大公報