民主黨黨員林子健懷疑「自編自導自演」，話自己畀內地「強力部門」擄走，但被揭發原來自行安全地離開所謂嘅「案發現場」，搭小巴入西貢嘅「第二案發現場」，搞到畀警方起訴《誤導警務人員罪》。「林子健事件」發生，本來反對派個個都歡天喜地衝出嚟「抽水」，甚至唔畀林子健報警住都要佢先開記者會，最終發現「抽錯水」、「屈錯人」就個個潛水；潛水都仲未夠，囍雨見到盲反派近日仲開始「消毒」，話林子健有迫害妄想症，為咗甩身，盲反派似乎再盡啲都做得出喎！

傳媒人「診斷」林子健有迫害妄想症？

噚日囍雨喺網上見到一條由所謂資深傳媒人吳志森評論「林子健事件」嘅影片，吳志森話睇林子健一啲都唔驚、信心滿滿嘅表情，話林子健係有病，而且係有迫害妄想症、自殘傾向、有幻想、釘自己「十字架」等等，仲話林子健作為病人都係「受害者」。首先，囍雨要問吳志森，佢最多都只係傳媒人，並唔係註冊精神科醫生，查實佢有咩資格越俎代庖為林子健診症？

其次，囍雨真係想問下民主黨，究竟佢哋認唔認同吳志森嘅講法；如果認同，到底係幾時開始有呢種想法？定還是佢哋一早知道，甚至「順水推舟」繼續造文章呢？

嗱，囍雨想講，吳志森呢種話人因為精神病所以「釘自己十字架」嘅說法如果係錯，明顯係對其他人極為嚴重嘅詆譭同侮辱，民主黨班高層作為林子健嘅領導，真係要同公眾交代清楚。觀乎吳志森嘅言行，佢表面上好似幫林子健講嘢，實則可能係想講林子健係「傻」嘅，其他反對派人士都係畀佢Fake咗啫，實行幫反對派消毒，將反對派近日抽水、老屈、抹黑內地同香港警方嘅指控「一筆勾銷」，但出到話人有精神病之餘仲要係迫害妄想、自殘傾向同幻想，吳志森有咩證據？如果用傳媒人角度為其他人「診症」，又會唔會太武斷呢？

林子健有病與否 民主黨罪責難卸

民主黨會唔會就吳志森言論作出回應，囍雨就唔知喇，但無論林子健係咪真係如吳志森所謂有咁多「精神病」，民主黨依然係罪責難逃。決定、策劃林子健未報謷、未入醫院而先開記者會嘅民主黨領導，一個係資深大律師李柱銘、一個又係律師嘅何俊仁、一個係經常誇口話自己係廉署前調查員嘅立法會議員林卓廷，完全唔核實內容，隨隨便便就去開記者招待會，仲要老屈內地部門「跨境執法」、「跨境違法」，造成公眾恐慌、浪費警力、浪貴公帑，抹黑埋中央政府同香港警察，民主黨唔係覺得講句等警方查清楚再交待就得呀？當初佢哋又等警方查好先開記者會？

一個見慣報案人、受害人嘅資深大律師，仲要係資深大律師名冊排第一嘅李柱銘，一個境界高到可以從容不迫地喺立法會會議廳睇AV嘅律師何俊仁，再加上富有「偵探頭腦」嘅前廉署調查員、立法會議員林卓廷，真係一啲都睇唔出林子健有問題？到底係佢哋唔發現有問題？係佢哋知道有問題而「將錯就錯」？定係佢哋有份製造問題，係今次「被擄」事件嘅同謀呢？

原圖：RTHK