前公民黨成員曾健超因為襲警、拒捕被判入獄五星期，又被投訴違反社工專業操守，雖然社工註冊局紀律聆訊委員會之前大比數通過投訴成立，但委員會喺表決懲罰曾健超嘅時候，竟然因為主席多投一票而反對建議，需要再討論懲處曾健超嘅問題。囍雨想問社工註冊局、尤其是主席倫智偉一句，反對或者拖延懲罰曾健超，社工註冊局係咪寧願斷送社工註冊局專業聲譽，都要包庇違法襲警嘅曾健超？

無先例可循不是包庇理由

社工註冊局主席倫志偉表示，因為今次曾健超事件無先例可循，所以要審慎處理，唔承認自己係拖延。囍雨真係唔明白，「無先例可循」係咩意思，如果因為曾健超作為社工竟然打警察而「無先例可循」，咁嚴重嘅事唔係應該更快、更果斷作出懲處曾健超嘅決定咩？又或者社工註冊局成員部分由專業社工組成，有冇先例可循都好，佢哋都係要作出專業判斷，盡快作出適當決定以捍衛社工專業，如果樣樣嘢都有先例可循，然後註冊局「照辦煮碗」就得，班註冊局成員仲有咩用武之地？

社工註用局遲遲都未作出裁決，囍雨真係好懷疑倫智偉佢哋係要包庇曾健超，原因好簡單，因為佢哋都係同路人，甚至一樣認為「違法抗命」係冇問題嘅；囍雨睇過網上資料，見過倫智偉喺2015年參選社工註冊局時喺宣傳冊中明確表明，「若有社工因公民抗命，被定罪而影響註冊，實屬荒謬」；即係話，如果有社工因為政治理由而「違法抗命」，懲罰個社工或者影響佢註冊，喺倫智偉嚟講係「荒謬」嘅。呢個道理係咪應該掉番轉嚟講，乜唔係社工註冊局包庇違法者先係荒謬咩？

不能以自由作為違法擋箭牌

至於曾健超本人，囍雨睇到佢話自己唔認為註冊局拖延處理，相信註冊局最終決定能夠保障社工自由，囍雨覺得曾健超根本就喺度偷換概念，因為社工或者任何市民有自由，都唔代表佢可以襲警、拒捕；曾健超如果覺得自己所作所為係「自由」，咁佢又做咩要放棄上訴即時入獄呢？囍雨希望佢唔好污蔑「自由」兩個字，更加唔好喺度踐踏法治。

社工註冊局到底要幾時先決定到點懲處曾健超仲係未知之數，但囍雨喺度奉勸社工註冊局成員、尤其係支持曾健超嘅成員，你哋背負嘅係社工專業、社會責任，拖延、包庇違法社工，最終只會令社工註冊局公信力受損，畀人感覺註冊局偏幫違法人士。成日講「公民抗命」、「違法達義」，但「抗命」最後一步唔係承擔罪責咩？希望社工註冊局公正處理事件，唔好向社福界甚至社會傳遞「抗命可違法」嘅錯誤訊息！

原圖：Stheadline