公民黨立法會議員譚文豪早前就拍咗條片，話要實測搭高鐵去廣州南站要幾耐，得出咗由福田去廣州南站要近49分鐘，西九龍去廣州南要「更耐」嘅「驚人」結論；噚日佢仲上載咗另一條質詢運房局局長陳帆嘅影片上網，過程中故意忽略陳帆嘅說話。反對派盲反高鐵同「一地兩檢」，大家都非常明白，但譚文豪呢種用影片抹黑官員仲要Ignore晒官員有理有據嘅回應，手法其實非常之「低庄」囉！

與官員對話片做手腳欠誠信

譚文豪上載嘅影片，內容只係不斷影住自己點樣質疑官員，但幾乎將陳帆嘅回應全部忽略，甚至當陳帆想答佢，現時高鐵香港段終點站廣州南站係「四橫四縱」戰略下「京廣線」嘅其中一站時，佢亦刻意插咀唔畀陳帆回應，而佢自己剪輯嘅短片，更係刻意略過晒陳帆嘅回應。咁做目的只有一個，就係營造官員「支吾以對」嘅錯覺，呢啲「抽水」行為真係幾低劣都有。

拍片計錯數反証「一地兩檢」重要

講返譚文豪條片，佢搞咁多嘢，講到底都係想「謀殺」高鐵。譚文豪花咁多時間拍條誤導片，夾硬話福田站去廣州南要47分鐘，再加上西九龍去福田要14分鐘，所以西九龍去廣州南要61分鐘，而唔係政府話嘅48分鐘，但就提都唔提福田去廣州南站係有中途站，必定需要耐啲時間嘅事實，用埋晒啲誤導方式做比較居心叵測，有理由相信佢玩「老屈」，但係正好反証如果有「一地兩檢」唔需要有中途下車或停車「再檢」，就可以發揮出高鐵最好效果。

作為立法會議員，譚文豪冇嘢叻，最叻就係學晒佢師傅公民黨主席梁家傑啲衰嘢。佢唔肯同市民講嘅係，香港高鐵直接接駁去廣州南站，目的係要利用呢個交通交匯點，貫通全國主要城市嘅交通網。老老實實，正如有網民所講，市民只係要去廣州市嘅話，的確唔需要搭高鐵囉，但係要駁通200幾個高鐵站就唔同喇！醒吓啦，飛機師！

原圖：RTHK