高鐵「一地兩檢」方案已經公布一段時間，反對派「盲反」就梗架啦，不過囍雨近日見到公民黨立法會議員陳淑莊嘅一言一行，實在非常睇唔過眼。成日話要政府就「一地兩檢」方案作公眾諮詢，但畀人問到如果市民支持「一地兩檢」方案又如何嘅時候，竟然厚顏到話就算民意「支持」，佢都可以「繼續反對」；到最近運房局局長陳帆邀請佢以立法會議員身份當面傾「一地兩檢」，佢又拒絕，話有咩留番喺立法會講。一個唔睇民意、唔參觀高鐵站口岸設計、有機會又唔見局長嘅立法會議員，一味「盲反」，仲係代表到民意嘅立法會議員咩？

沒資格拒絕會面

反對派反對「一地兩檢」，理由千奇百怪，不過無論點反都好，身為民意代表都唔可以拒絕同官員會面。喂，選民選你出去唔係齋投反對票架，係想你將社會意見帶入政府、當面話畀政府官員聽，而家陳帆局長講明因為陳淑莊係立法會議員所以邀請佢會面傾「一地兩檢」，陳淑莊又有咩資格去拒絕呀？佢拒絕，咪即係有負市民所託囉！

的確，政府官員已經答應未來會不斷出席立法會會議回應議員質詢，嘗試釋除社會同議員疑慮，但咁都唔代表陳淑莊可以拒絕會面喎，大佬呀，見面溝通點會嫌多先？單對單會面溝通，同官員出席立法會會議答問題，兩者冇矛盾、冇衝突，正常立法會議員會兩樣都做晒囉，陳淑莊以「立法會會議」做藉口拒絕見面，根本就唔成理由。

拒溝通、拒參觀 反對派做乜議員？

不過咁，反對派奇怪嘅又點止陳淑莊一個吖，班反對派反「一地兩檢」，反到連參觀高鐵站都唔去，有高鐵、「一地兩檢」唔去了解，走去開記者反「一地兩檢」，呢個係咩玩法？要研究、反對「一地兩檢」，係咪都應該去高鐵站睇下兩地口岸區，有冇可能「被自願」進入「內地口岸區」先？

喺未來幾個月，囍雨深信反對派都會繼續要求政府就「一地兩檢」做公眾諮詢架喇，不過要求諮詢還要求，就算真係做公眾諮詢，而結果係民意支持「一地兩檢」都好，對於反對派嚟講都係冇用嘅。囍雨前幾日聽電台，聽到陳淑莊畀其他立法會議員問佢如果民意支持「一地兩檢」佢會點，佢大大聲咁類似話「民意支持咪支持囉，我可以繼續反對」。換句話說，反對派所要求嘅係「假諮詢」，因為無論結果如何，佢哋都會有種種藉口繼續盲反！

反對派從未尊重民意

咁公眾諮詢對佢哋嚟講有咩用？對佢哋嚟講，佢哋可以利用公眾諮詢不斷講話，日夜散佈「謀殺」高鐵嘅言論，然後做個意見書樣本出嚟畀啲人簽個名交畀政府，如果最後民意反對「一地兩檢」，佢哋梗係繼續大條道理反啦！萬一民意支持「一地兩檢」又如何？反對派都唔怕架喎，到時佢哋話雖然民意支持「一地兩檢」，但方案有違佢哋「原則」，所以要為「理念」繼續反。結果無論點佢哋都反，呢個「公我贏、字你輸」嘅概念，幾乎可以應用喺反對派對政府政策、議案嘅一貫作風。

今日囍雨睇到有報章委託大學做民調，結果顯示超過五成市民支持「一地兩檢」方案；可惜，呢啲民意唔會得到反對派採納，佢哋打從心底就要推倒政府嘅政策、兩地磋商嘅成果。由一班唔番內地嘅盲反派反對一個利民嘅往來內地口岸政策，其實真係好諷刺！囍雨好想講，反對派你哋唔想搭高鐵，我哋香港市民想呀，你哋唔搭，都唔好阻住地球轉呀，唔該！

原圖：RTHK