上星期六港鐵觀塘線「爆大鑊」，足足延誤咗超過十小時，搞到九龍東交通陷入大混亂，唔少市民都怨聲載道；據傳媒報導，今次延誤盡破港鐵故障時間同罰款紀錄，估計今次港鐵要罰款2,000萬元有多。其實，港鐵近期事故頻頻，短短幾日就發生幾次事故，小則延誤一、兩個鐘、大則好似今次咁十幾個鐘，到底係港鐵信號系統已經唔能夠承受頻密嘅班次同複雜嘅鐵路網，定係港鐵監管不力呢？

觀塘線訊號系統已過時？

囍雨前兩日睇新聞，見到市民因為港鐵延誤都非常之嬲，嬲嘅唔只係港鐵又「跪低」咁簡單，而係有市民指港鐵不斷話十五分鐘之後就冇事，但點知等咗成粒鐘都仲喺度等緊。對於港鐵又出現信號故障，正常人第一個反應就係諗其實港鐵嘅系統係咪已經過時，不過噚日睇港鐵發言人嘅公開回應，就話觀塘線信號系統雖然已經運行咗一段長時間（大約為1989年的產物），但一般訊號系統可以用成30年，所以未必係系統太舊而出意外。

囍雨唔係鐵路專家或者鐵路迷，梗係唔係好明咩係「信號數據傳輸間歇性故障」啦，但囍雨作為一個普通乘客，就喺度諗港鐵係咪應該做番啲嘢重拾我哋呢啲小市民嘅信心呢？例如罰款會回饋乘客，但回饋方式可唔可以唔好咁迂迴，推出咩回程優惠、搭幾多程送一程等等，而直接將罰款扣減落票價度呢？又或者港鐵因應今年比較多事故，而罰自己來年唔好加價呢？

表現不濟 還可加可減？

現時港鐵嘅票價係根據「可加可減」機制調整，機制根據「工資指數」、通脹等而調整，有評論以「有加無減」形容機制，大家試想下，如果要工資減或者通縮等情況先會減價，香港經濟係一件幾恐怖嘅事，又會有幾多年先發生一次？又或者用常理睇，如果一間以政府為大股東嘅鐵路公司事故頻頻，然後仲可以成日加價，又講唔講得通呢？

所以，除咗有議員建議將港鐵故障應該與高層薪酬花紅掛鉤之外，囍雨覺得不妨考慮將港鐵故障同票價掛鉤，如果港鐵喺某年度內嘅故障事故次數或時數超過某個限度，政府甚至港鐵自己就要考慮來年係咪仲應該加價。咁樣做唔單止為票價，其實都係改善服務嘅動力；如果港鐵啲小股東見到港鐵因為故障而影響盈利，相信會畀番一定壓力港鐵，要求管理層改善、穩定服務。呢啲想法係咪可以付諸實行呢？囍雨唔肯定，反正都係囍雨用個人判斷提出少少意見啫。但所謂「針唔拮到肉唔知痛」，要港鐵公司再穩定好鐵路服務，或者真係有需要用啲非常手段。

原圖：RTHK