囍雨噚日喺網上面見到張製圖，內容關於反對派「凡事反」對嘅神邏輯，囍雨覺得幾得意想喺度同大家分享吓有關內容。內容大概係講特首林鄭月娥物色問責官員，如果係搵個有選舉經驗而輸咗嘅人去做官，會畀反對派鬧係「敗部復活」；如果搵個無選舉經驗嘅都係唔得架喎，因為無選舉經驗即係無民意代表；咁贏咗選舉去做官員得唔得呢？都唔得架喎，因為如果係建制派就一定有政治立場同埋係政治交易啦！

呢樣又唔得，果樣又唔得，政府搵個反對派人士加入政府得喇掛？答案都係唔得嘅，因為反對派做開反對角色，有幾多個肯加入政府呢？就算有人想加入政府，首先唔該你退黨先，分分鐘仲會畀人話係貪圖名利，真係動輒得咎！簡單嚟講，就係政府搵人加入政府，都極有可能畀反對派鬧，你話A佢一定話B，到你話B佢又要C，認真「屈機」。

「反對派」退化成「盲反派」

講返最近獲任命為教育局副局長嘅蔡若蓮博士，反對派唔知點解同佢好似有深仇大恨咁，日以繼夜、夜以繼日瘋狂咁攻擊，一時又話佢輸咗選舉所以唔適合做副局長、一時又話佢先前所屬嘅組織有既定政治立場，所以蔡若蓮做副局長都一定有政治任務等等。其實諗深一層，對反對派嚟講，無論係輸過選舉、無選過舉、贏咗選舉，甚至係搵反對派人士加入政府都好，基本上反對派都會大力反對，名副其實「凡事反對」。

走入熱廚房證明有承擔

老實講，就算政府個「熱廚房」有幾熱都好，問責官員呢啲「三煞位」始終要有人做，亦好難全部問責官員都係公務員調任，如果某啲社會人士能力、履歷以至學歷都適合，而且肯擔起重任嚟做問責官員，反對派如果公道啲處理，都應該等人上任咗、做咗一輪嘢先決定某啲人係咪稱職啦。好似蔡若蓮咁，反對派加諸一大堆罪名畀佢，又話蔡若蓮入到教育局「可能乜乜乜」嚟反對佢，只要稍為有邏輯嘅人都諗到，以某人將來「可能」做某件事而阻止某人而家為社會做事，點講都講唔通啦！

其實反對派對咁多建制人士或者較親建制人士咁反感，點解佢哋又唔推薦下佢哋果邊啲人才畀政府呢？到底係佢哋全部都唔想入政府？定係佢哋其實反對就叻，執政、行政就「無能為力」呢？相信心清眼亮既市民心入面一定有答案！

原圖：DAB