唉，又係「UGL事件」，講咗足足兩年幾三年，反對派講來講去都拎唔出證據，到底仲要講到幾時？不過咁，香港係法治之區，如果執法部門真係查緊件事，我哋當然都會支持，亦絕對唔會施壓影響調查，偏偏香港有個叫民主黨嘅老牌政黨，竟然搞個民調出嚟疑似向廉政公署施壓，而呢個黨仲有個立法會議員成日將自己做過廉署掛喺口邊添，你話過份唔過份吖？

民主黨企圖干預調查方向

老牌政黨民主黨喺上個月5號到19號進行電話訪問，聲稱成功訪問咗1,226個市民，話當中有超過六成支持廉署繼續調查UGL事件喎。是咁的，囍雨唔係質疑呢個調查結果，喂，講真吖，支持廉署繼續調查案件，好正路吖，相信絕大部份市民都會支持喎，但諗深一層，呢個民調目的係咩？係唔係想藉「民意」向廉署施壓？

政黨不應用「民調」施壓

民主黨立法會議員林卓廷成日話自己做過廉署調查員，理應清楚廉署調查個案係唔應該受到任何形成干預。普通一個半個市民，當然就干預唔到廉署啦，但而家民主黨係用「民調」方式喎，咁就唔同講法喇，佢班人恃住自己係立法會議員，拎住呢個民調周圍唱，總可以構成到輿論壓力囉，就算囍雨相信廉署最終唔會受影響都好，咁都好唔公平啫！

況且呢個民調本身個邏輯就好古怪，試問一句，如果大部份受訪者認為「唔應該」繼續調查，咁唔通民主黨又會要求廉署「終止調查」呀？用「民調」去要求市民就單一個案表態，咁仲唔係「公審」？呢種自組地下法庭嘅手法，完全有違程序公義，對任何一方都極之不公平。

林卓廷沒資格做議員

林卓廷係民主黨立法會議員，又係立法會UGL調查委員會成員，囍雨打死唔信個民調正式開始前佢完全冇畀意見。一個自稱做過廉署嘅人，成日抽廉署水唔特止，仲要連「不干預調查」原則都打破埋，你話吖，呢啲咁嘅嘢，仲有咩資格去做立法會議員吖！算把啦！

圖片來源：香港電台即時新聞