政府公布高鐵「一地兩檢」方案大約一個禮拜，呢幾日反對派用盡一切方法，不斷創作唔同「故仔」去抹黑「一地兩檢」，好似資深法律界人士李柱銘同吳靄儀，分別憑空想像出諸如「租借」佔領區行使內地法律、市民「被自願」入「內地口岸區」等等，去到今日，估都估到係到港大法律學院前院長陳文敏出場啦，呢位名譽資深大律師為咗謀殺「一地兩檢」，竟然用「三不管」九龍城寨比喻西九高鐵總站，為咗反「一地兩檢」，到底反對派仲有咩唔講得出口呢？

九龍城寨根本難跟高鐵站相比

陳文敏今朝喺電台接受訪問嘅時候，提到世界上冇咩地方突然劃出一個地方畀其他國家管轄（中國係其他國家？），較相似嘅地方有上海同九龍城寨。一聽到陳文敏咁講，囍雨只想用胡說八道形容陳文敏！識少少香港史，就知道喺19世紀末期英國同清政府簽署條約，英國向清廷「租借」新界99年，當時清政府要求保留九龍城寨管轄權，之後港英政府派兵攻佔城寨，清兵被趕走，之後幾十年城寨進入無人管治狀況（之後國民政府支持喺城寨成立福利會等歷史在此不贅）。

一個歷史背景咁複雜嘅地方，竟然可以攞嚟同西九高鐵站相比？陳文敏係唔清楚歷史，定係盲反「一地兩檢」反上腦？大家心知肚明啦。諗真啲，陳文敏用九龍城寨比喻西九高鐵站、「一地兩檢」其實十分之毒辣，無論係年紀較大去過九龍城寨嘅市民，又或者年紀較細但從各種渠道耳聞九龍城寨嘅人，唔少人都會覺得九龍城寨係一個烏煙瘴氣、充斥黃賭毒嘅地方；陳文敏攞九龍城寨嚟做例子，係咪想借此醜化埋西九高鐵站？一個喺法律界被視為德高望重嘅人，隨便用唔恰當嘅例子嚟同西九高鐵站做比較，真係令人失望。

推至極端　只為謀殺「一地兩檢」

除咗用九龍城寨比喻西九高鐵總站同「一地兩檢」，陳文敏亦同其他反對派一樣，都喺度用「無限放大」嘅方式抹黑「一地兩檢」，例如話先例一開，他朝「內地口岸區」地方唔夠用要「劃大啲範圍」，不如將九龍、新界列為內地口岸；又例如要便利，不如機場、火車都效法，甚至推行「一國一制」。呢啲將情況推到極端，將一個西九高鐵總站特殊情況無啦啦推到全港各地方嘅講法，其實稍為諗下都知道唔會發生，但陳文敏等人就係要「一味靠嚇」，企圖令香港市民有咁驚、得咁驚！

講開「一地兩檢」要方便，反對派成日老屈話「一地兩檢」方便內地執法人員拉人，但佢哋從來都唔同大家討論，「一地兩檢」真正方便嘅係香港市民、高鐵用家；可能反對派班人自己無諗住搭高鐵，所以覺得用家感受、香港人便利與否唔重要，但佢哋嘅論點似乎點都否認唔到，西九高鐵站行「一地兩檢」，係一個對旅客、往來內地人士極為便利、節省時間嘅利民措施。

原圖：RTHK