政府大約喺一星期之前公布高鐵「一地兩檢」方案，呢個星期可以話係「子彈橫飛」，反對派開盡Turbo謀殺「一地兩檢」方案，「割地」、「自閹」等政治口號，講到出口成章咁，最終咪又係攞嚟抹黑「一地兩檢」！大家以為反對派啲鬧劇差唔多完結？錯喇！因為近日連前法律界立法會議員吳靄儀都加入唱衰「一地兩檢」行列，仲話香港人可能會「被自願」走入高鐵站，為咗謀殺「一地兩檢」，你話反對派可以去到幾盡呢？

市民會「被自願」走入內地口岸區？

根據吳靄儀今朝喺電台嘅講法，西九高鐵總站重重關卡，如果市民入咗去要出番嚟幾難，質疑會唔會有人「冇意間」行咗入去、「被自願」拉入去等等。對於吳靄儀呢種說法，囍雨覺得除咗用荒謬嚟形容，都唔知講咩好。其實，吳靄儀已經假設咗內地執法部門會利用「內地口岸區」拉人走，咁仲有咩討論空間呢？更重要嘅係，佢講到內地執法人員拉人入高鐵「內地口岸區」無難度咁款，但查實佢本人到底知唔知乜嘢係「一地兩檢」？又知唔知道要去「內地口岸區」，首先要過咗香港出境果關？吳靄儀呢個假設，即係話香港海關或者出境部門會無條件放人入去「內地口岸區」，簡直係發神經。

只要理性啲諗下吳靄儀嘅說法，就會知道佢講嘅嘢實際上站唔住陣腳。內地執法部門會嚟香港拉人，呢個說法已經大有商榷餘地，仲要講到香港入境處、海關、警察、港鐵職員對此視而不見，真係用吓腦都知冇可能啦！吳靄儀講出呢啲連「假設性」都算唔上嘅例子，唯一作用就係要嚇怕香港人囉。

法律界人士也漠視情理？

今次已經唔係非建制派所謂法律界人士首次講出呢啲咁嘅廢話，無論係吳靄儀嘅「被自願」入「內地口岸區」，抑或係李柱銘嘅「出租」佔領區，在法在情在理，其實都完全講唔通；囍雨尋日寫文批評李柱銘言論時，就話佢係庸人自擾，今次輪到吳靄儀，根本就係妄想症，勢估唔到一個讀法律嘅前議員，竟然唔係講法理，而係「創作力量同幻想，會嚇你一跳」！

講真，香港係多元社會，大家對「一地兩檢」有唔同睇法真心好正常，只要有理有據咁去討論，支持又好、反對又好，對社會討論都會有幫助，但如果只係一味用憑空想像嘅情況反對「一地兩檢」，咁同唱衰、抹黑、誤導又有咩分別呢？

原圖：RTHK