政府幾日前公布高鐵「一地兩檢」方案，反對派急急成立「關注組」，各路人馬各有分工，全日反對「一地兩檢」 方案，甚至連反對派元老級人馬李柱銘都出動，齊齊「謀殺」方案；李柱銘仲話，如果將來發生第二次佔領行動，內地可以要求香港將佔領地區出租，再行使內地法律強行清場。呢種天方夜谭嘅說法，目的只有一個，就係嚇香港人，煽動香港市民一齊反「一地兩檢」。

高鐵站與佔領區不能類比

李柱銘作為一個資深大律師，講出如此荒謬嘅說法，根本道理上就係講唔通。西九高鐵站之所以要「一地兩檢」，係因為要方便高鐵乘客可以便捷地過關，往來香港同內地多個主要城市；但李柱銘講到香港其他地方好似佔領區都可以租出去行內地法律，根本係將事情「推到極端」，要引起香港市民嘅恐懼情緒，支持佢哋反「一兩地檢」。試問如果再有違法佔領事件又要再清場，有需要行內地法律咩？根本完全唔需要，因為香港嘅法律本身可以處理，警方有能力做到，而且亦都實行過。

囍雨唔係咩法律專家，但如果香港要實行全國性法律，理論上係可以根據《基本法》第18條，即係香港喺動亂情況下進入緊急狀態，中央政府可宣布全國性法律喺香港實施。但如果中央政府真係要實行全國性法律，可能喺2014年違法佔領行動期間已經實行啦，點解無實行？囍雨覺得係因為相信當時嘅特區政府同警察有能力處理事件；李柱銘硬將要喺香港實行內地法律嘅「帽子」扣喺中央身上，根本就係唯恐天下不亂！

李柱銘想二次佔領？

唔知李柱銘呢啲反對派人士好懷念違法佔領時期嘅「抗爭時光」，竟然以「二次佔領」作為反「一地兩檢」嘅假設例子；對於將來會唔會發生「二次佔領」，囍雨無從得知，但囍雨奉勸李柱銘等人諗都唔好諗，因為違法佔領唔單止係違法抗命咁簡單，而係反對派班人係咁推人地啲子女、年青人出嚟做「炮灰」，煽動佢哋去違法、衝擊政府，自己就坐數政治利益，再喺各級選舉以「違法抗命」、「敢於反對」為旗幟爭議席。如果佔領行動真係咁有榮譽感，大家有冇見過李柱銘等等反對派元老啲仔女出嚟佔領呢？囍雨就唔覺喇，有風險嘅嘢，梗係搵其他人做啦！

喺未來幾個月，「一地兩檢」都一定係建制派、反對派「必爭之地」，但當反對派不斷舉出一啲稀奇古怪嘅例子出嚟嘅時候，大家真係要諗清楚，乜實行「一地兩檢」就等於成個香港變行內地法咁誇張架？

原圖：RTHK