政府噚日公布「一地兩檢」方案，西九高鐵站部分區域將成為「內地口岸區」，反對派人士即刻用「割地」等等負面詞彙意圖扼殺「一地兩檢」。呢類舉動，本來都係意料中事，因為無論「一地兩檢」幾便利、幾有效益都好，反對派為反而反，一定反對到底。不過，最令囍雨睇唔過眼，係反對派以至部分網民都有個天大謬誤，就係講到今日租咗部分高鐵站部份範圍出去，就等於斷送咗成個香港咁，呢啲咪危言聳聽囉！

無限放大「一地兩檢」 只為散播恐懼

噚日囍雨睇新聞，見到反對派議員張超雄以租屋去比喻，話業主今日要個窗台，第日要個廁所，咁落去仲得了；類似說法，喺網上亦唔罕見，有網民就話咁搞法，會唔會遲啲連機場、碼頭、中港巴士站都設立「內地口岸區」，由內地執法人員管理香港等等。凡此種種，全部都言過其實，目的亦只有一個，就係散播恐懼，令人因而生畏，齊齊反對「一地兩檢」！

囍雨諗起平時睇邏輯書時睇到嘅「滑坡謬誤」，逐啲逐啲將情況講到最壞，但其實已經推到一個極端嘅情況。套用去「一地兩檢」，只要係心清眼亮嘅市民都會明白，高鐵「一地兩檢」可以話係一個非常特別嘅例子，日後會唔會連機場、碼頭、中港巴士站等都變埋「內地口岸區」，高鐵運作模式，以及內地車站設計，同其他連輸工具根本唔可以相提並論，話其他地方會變成「內地口岸區」，真係聽到都知冇可能，更加就唔會發展到去張超雄所講「成間屋都冇咗」啦！

高鐵為內地執法開路？

坊間另一種普遍說法，就係做呢樣、果樣可能會喺「內地口岸區」畀人拘捕等等。查實一般香港人都知，去到內地地方要守內地法律，好多你以為喺香港做係「冇問題」嘅事，去到內地就唔可以做，情況就好似你去泰國，唔可以侮辱皇室、去到伊斯蘭國家，唔可以侮辱回教先知一樣；你喺香港做呢啲，道德上當然唔啱，但亦未必要承擔法律後果，但去到其他司法管轄區呢？咁就好難講喇。

講真吖，正常香港人如果喺西九搭高鐵，入到內地管制區，有幾多仲會有意無意「挑戰」內地法規呢？去得西九總站內地管制區，自自然然係要返內地啦，最有可能墮入法網嘅，其實只會係嗰班故意挑釁內地、刻意違法「搏拉」嘅人，一般市民根本不受影響。

喺未來幾個月，相信「一地兩檢」會繼續畀人砌、抹黑，不過當反對派同埋個別媒體全力唱衰「一地兩檢」之際，囍雨作為守法嘅平常人家，只要好似平時過深圳灣、落馬洲口岸咁過境，佢哋舉咁多例子，其實關唔關我哋事呢？

原圖：expressraillink.hk