非建制派為咗包庇六個因為違反《基本法》而被褫奪議席嘅自己友，竟然喺立法會財委會上不斷「拉布」，將香港市民同民生事項當做「人質」，結果成功將包括興建公屋、骨灰龕、公路等等嘅項目拖死，要留待班非建制派十月放完暑假返嚟後先可再審。「拉布」本身已經唔啱，「拉布」唔認仲要諉過於人就更討人厭，尋日就有人示範「自打嘴巴」，即場畀人踢爆表裡不一，名副其實醜出國際！

非建制派賊喊捉賊

非建制派堅持無視民間疾苦，為咗一己政治私利而喺財委會「拉布」，反正囍雨已經寫咗幾日，詳情就唔再多講喇。不過，如果大家有留意財委會會議的話，尋日有兩個非建制派議員真係醜出國際囉，呢兩個平日道貌岸然扮晒文人咁款嘅，就係擁有博士學位嘅工黨議員張超雄，以及自稱係作家嘅民主黨鄺俊宇。呢兩個人平日，成日將關懷弱勢擺喺口邊，但當去到玩政治時，民生梗係拋低喺後面啦。

話說去到會議中後段，好多民生相關撥款申請仍然因為「拉布」關係未能討論，呢個時候張超雄竟然賊喊捉賊，大聲對住財委會主席陳健波講：「加會啦、加會啦，點解唔加會？仲要去旅行？」陳健波冇你咁好氣，即時翻查資料回應話：「喺最近二十號上、下午係咪加會，二十一號係咪加會，你全部不支持，你先檢討自己！」

民主黨有份參與「拉布」

張超雄嘅言論當然就醜出國際啦，不過嗰鄺俊宇其實亦唔好好多喎，佢批評：「因為你（陳健波）唔加會，導致今次會期最後一次會，就咁樣結束，你作為財委會主席，這次這個安排失當要負上責任。」嘩，講到大義凜然咁，囍雨都聽到「巧感動」，不過感動咗幾秒咋，陳健波又再反駁：「鄺俊宇根本就冇回覆(開會)，所以請你唔好胡亂指罵主席。」

事實擺在眼前啦，誰是誰非亦好清楚，成件事根本係非建制派明知「拉布」搞到民生項目上唔到馬，呢個行為不得人心，於是喺會議中尾段，就開始「老屈」建制派唔肯開會，但事實係，當初為咗拉倒民生議案，佢哋根本就唔想「加會」，結果咪畀人即場踢爆囉。

非建制派真面目呈公眾眼前

非建制派成日將公義掛喺口邊，其實處事最唔公道、最唔公義、永遠持有雙重標準嘅就係佢哋！今次非建制派「政治凌駕民生」，為咗不折不扣嘅政治理由而拖死大量民生議案，包括東涌新市鎮發展、本年度公務員薪酬調整、中九龍幹線主要工程及沙嶺墳場骨灰安置所等，呢筆帳，香港市民一定要同佢哋算得清清楚楚！

圖片來源：頭條日報