幾個前立法會議員畀法院DQ（取消議員資格），根據反對派人士嘅套路，就算明知自己違法，都梗係話政府係打壓啦！其中被DQ嘅前建築、測量、規劃及園境界立法會議員姚松炎，就好引以為榮咁話自己係第一個因為爭取「可持續發展」而被DQ嘅人，講到大義凜然咁，真係令人心寒。

好聽還好聽，大家必須要搞清楚，姚松炎唔係因為爭取「可持續發展」而被DQ，而係佢被法庭裁定宣誓無效所以被DQ，甚至根據佢嘅誓詞，囍雨覺得就算無釋法，佢都好有可能被DQ。仲有，佢話佢一直爭取「可持續發展」，睇佢同佢同啲同路人喺立法會嘅表現，似係破壞香港持續發展多啲喎！筆者數過佢最少有三宗罪。

第一宗罪：拉布阻延民生工程

有時候為市民、社會爭取啲乜就唔係用口講嘅，當姚松炎之流不斷話為社會爭取啲咩嘅時候，大家最好都係睇下佢哋實質做過啲乜。今屆立法會拉布、阻延會議問題嚴重就好多人都知，據報而家仲有成760億元工程未批，今日囍雨睇相關報導，涉及香港「可持續發展」嘅包括東涌新市鎮項目、醫院興建計劃、工務工程等工程，如果姚松炎真係咁關心香港「可持續發展」，佢同佢啲同路人做咩又咁努力拖香港「後腳」先？

第二宗罪：打爛建築業界飯碗

仲有，姚松炎之前作為建築、測量、規劃及園境界嘅議員，大家都唔係好覺得佢有用專業維護業界利益。有建造業人士日前接受訪問時候，就講到明財委會有咁多工務工程未通過，「拉布」已經影響到唔少工程已經呈懸崖式下跌，唔少中小企已經「無飯開」；當中嘅壞影響，隨着高鐵、港珠澳大橋等大型基建項目相繼落成，新工程項目銜接唔上，業界生計從工人到專業人士到老闆都岌岌可危。議員唔應該以政治目的凌駕建造業生計，敢問姚松炎，作為業界代表，佢又點樣為業界爭取利益，甚或「可持續發展」呢？

第三宗罪：政治凌駕專業

說穿了，其實用一句「政治凌駕專業」去形容姚松炎就最合適，無論係反對派拖延工程，到有唔少業界人士被打爛飯碗，基本上都見唔到姚松炎為業界做過啲咩，睇到佢好唔專業囉！今日，佢仲好好聲聲話自己為香港爭取「可持續發展」，唔通香港「可持續發展」唔包括民生工程項目？無論係醫療、房屋、基建工程、工務工程等項目，全部都牽涉到730萬市民甚至香港未來，姚松炎有冇聽過業界訴求，定只係一心玩政治、反政府，其實十分清楚明白。

事已至此，包括姚松炎在內嘅前議員仲要堅稱自己冇錯，呢番說話可能吸引到部分支持者，但只要細心睇清楚咩事，姚松炎就係自己「玩嘢」，要全港市民一齊找數嘅政棍，「可持續發展」係一個好吸引嘅口號，但實際係無論對業界、對市民都係「不可持續」囉！「不可持續」做議員嘅姚松炎，今日仲唔明白，選民選佢出嚟係為市民謀福利，唔係出嚟擺政治姿態呢！

原圖：Takungpao