四個前議員被法庭褫奪議員資格，非建制派立刻群起而攻，一時話政府濫用司法程序，一時又話「人大釋法」打壓議員，誰不知全部都係廢話。囍雨見到部分反對派人士最鍾意掛住喺口邊嘅說話，就係民選議員嘅議席係唔應該被剝奪，因為佢哋係選民選入議會，只有選民先可以「DQ佢哋」云云。講出類似嘅說話除咗有率先被「DQ」、公然宣獨辱華嘅梁頌恆游蕙禎，仲有同樣面臨DQ案嘅鄭松泰。見到呢啲謬論，囍雨要問一句，唔通「民選」就大晒？「民選」議員就唔使守法？

民意要尊重 議員要守法

民意重唔重要？重要！民選議員需唔需要尊重？需要！對於由選民選入議會嘅立法會議員，政府官員、各機構以至市民大眾都應該尊重佢哋，因為佢哋代表緊部分民意，但尊重還尊重，就算有民意援權，亦唔代表法治可以妥協。講得極端啲，假設一個受盡全港一致歡迎嘅藝人犯咗嚴重刑事罪行，唔通可以因為民意想佢冇事而唔執法咩？當然唔可以啦，乜呢個道理難明咩？

好似鄭松泰咁，佢知唔知宣誓有指定要求同格式，知唔知宣誓無效有咩後果？囍雨絕對唔相信佢唔知道。第一，政府喺候任議員宣誓前一日已經勸啲議員要依法宣誓，又援引埋2004年法庭有關立法會議員宣誓嘅案件；第二，立法會秘書處其實都表明過原則上議員宣誓時唔可以對誓詞作加減；第三，鄭松泰作為立法會議員、博士、大學導師，會唔會對有關宣誓嘅法律問題一無所知呢？「抗爭」得咁「聰明」，而家畀人告喇，鄭松泰係咪咎由自取先？

梁、游還是死不悔改

至於梁頌恆、游蕙禎，囍雨有啲唔明白，事情發展至今，梁、游仲覺得民選議員嘅議席唔可以被取消，只要有幾萬人投票畀佢哋就「大晒」？喺佢哋眼中，《基本法》係咪只係一紙空文？是非黑白其實好清晰，喺梁、游以至鄭松泰等人眼中，有利於佢哋嘅就係「法律」，會大力擁抱，例如參選權或者有關議員嘅法律地位等。但如果佢哋認為有法律不利自己，就會視若無睹，甚至批評依法執法的政府「政治打壓」同「濫用」司法程序等等。

「公我贏、字你輸」，非建制派唔通真係以為自己可以凌駕法律同公眾利益？以為自己係「民選」就可以為所欲為？

原圖：wenweipo