再有四名立法會議員因為宣誓「玩嘢」而被法庭撤銷議員資格，成為社會近日討論得最熱烈嘅新聞。事情好簡單，有人違反《基本法》，政府執行《基本法》司法覆核；不過，總有啲人要以陰謀論睇件事，講到政府執法有錯、議員宣誓玩嘢冇問題咁，亦有啲人開始伸出魔爪，試圖要脅政府「停止」執法，係邊個？咪就係已經表明必定走數嘅「違法佔領」始作俑者戴耀廷囉！

身為法律「學者」，戴副教授今次竟然想行政、立法同司法三權一齊干預，包括叫政府「唔好執法」、「唔好追討訟費」，仲要求特首林鄭月娥介入立法會事務，叫議員「唔好修改議事規則」同「唔好立23條」等。法律「學者」喎，真係聽到心寒呀！

豈能禁止政府執法

因應「DQ案」，戴耀廷首先要求政府承諾，唔好再提出司法程序DQ（撤銷資格）其他議員。老實講，呢個說法即係要求行政干預法治，政府告唔告一個人，又或者提唔提出司法程序，講嘅係「證據」；今日政府執法，反對派屈政府濫用司法程序，如果唔執法，係咪「有法不依」先啱？戴耀廷叫政府唔好提告，真係十分之唔合理。

仲有，戴耀廷可能掛住搞政治，完全唔理法院判詞。事實上，高等法院首席法官張舉能喺「梁游DQ案」已經講明，特首有執行《基本法》嘅「憲制責任」，如果政府未來經研究後，真係再發現有議員喺宣誓期間違反《基本法》而值得被DQ，特首就有責任提出司法覆核，因政治理由唔做，咁就係「人治」，唔係「法治」！

公帑運用豈能兒戲

再者，戴耀廷要求唔好追討被DQ嘅四位前議員訟費，囍雨覺得政府其實好難唔追訟費，點解？唔係四位前議員有冇錢賠嘅問題，而係訴訟成本，全部都係公帑。今次訴訟嘅起因，係有幾個議員宣誓有問題在先，政府提出訴訟程序在後；嚴格嚟講，佢哋係「違法者」，試問有冇可能因為佢哋係「民主派」，所以就可以唔駛佢哋畀訟費？乜咁樣公平咩？

干預立法會豈有此理

囍雨認為，戴耀廷另一個離譜嘅建議，係要求特首林太表明「不支持立法會在完成所有補選前修改議事規則」！嘩，呢個真心離譜，戴副教授意思，即係要「行政干預立法」，乜呢個唔係非建制派議員成日批評嘅咩？點解今日非建制派有事發生，就要打倒昨日的我？傻的嗎？講到尾，修唔修改「議事規則」，完全係立法會內部事務，修唔修改，唔應該係林太決定，更加唔到戴耀廷去決定或者干預！

戴耀廷要林太同政府作出種種承諾，根本就係於理不合，一切以「和諧」為名，實則只係為包庇違法違憲嘅非建制派自己友。戴耀廷身為法律學者，諗都諗唔到已經去到一個地步係想干預行政、立法加司法。囍雨喺度唔該戴耀廷醒一醒，諗下自己講啲嘢合唔合理，唔好再將法律問題政治化，喺度撈政治油水！

原圖：Takungpao