公信力早已蕩然無存嘅立法會「UGL調查委員會」今日又開會，一如既往，非建制派歪理百出，嘗試為政治攻訐前特首梁振英一事開脫，同時不停護短，瘋狂包庇非建制派自己友！今次又到民主黨林卓廷，佢不單拒絕建制派要求會計界梁繼昌辭去委員會職務嘅合理要求，更用埋晒啲歪理去誤導公眾，香港有啲咁嘅政客，真係令人惋惜。

梁繼昌利益角色衝突明顯

相信大家仍然記得，梁繼昌同梁振英之間仍然有官司糾紛，正正係呢一重關係，令到社會都普遍認同，梁繼昌喺事件中有明顯利益衝突破，的確係唔適合繼續留喺「UGL調查委員會」裡面工作。

可惜，梁繼昌對訴求視若無睹，堅拒辭職，於是委員會另一成員工聯會黃國健，今日就喺會上提出，要求梁繼昌辭職，點知同樣充滿角色衝突嘅林卓廷竟大力反對，表現令人失望。

林卓廷混淆社聽

林卓廷話，如果有委員被調查人士民事控告就要離開委員會，咁委員會裡面四個民主派議員，每一個過去幾年都不斷批評梁振英，UGL也好、人品或者人格也好，梁振英絕對有理由提出所謂誹謗訴訟，反問咁唔通都要佢哋四個辭職咩。

聽落似有道理，其實係歪理，而且鬼拍後尾枕！梁繼昌牽涉嘅非普通民事官司，而係同UGL事件有直接關係嘅誹謗官司（指梁振英在事件中逃稅）。梁振英有冇逃稅，係關鍵之一，委員會其中一項工作就係要查出答案，將官司同民事糾紛相提並論，明顯就係混淆視！

梁繼昌一人分飾三角 點會冇衝突？

仲有，梁繼昌喺「UGL事件」中涉及嘅衝突，並唔止因為佢正被控誹謗。當日，係梁繼昌率先去信稅局局長要求調查「UGL事件」，其後又向立法會提交呈請書，要求成立專委會調查「UGL事件」，最後再加親自加入專委會，一人身兼「報案人」、「主控官」同「陪審員」三種角色，角色衝突既直接又明顯。

林卓廷不斷包庇護短，從來冇就呢啲質疑出嚟回應，市民點相信你班委員可公正處事？仲有，正如林卓廷所講，呢班人過去不斷就「UGL事件」提出指控，無論係喺委員會成立「前」或者「後」都一樣。

係囉，佢咪講出咗重點囉，佢身為調查委員會成員，點解可以喺委員會外講「個人意見」？你有冇見過陪審員喺法庭外，周圍講關於案件嘅個人意見吖？

UGL委員會已成政治SHOW舞台

講到底，市民只要知道一樣嘢就足夠，就係立法會呢個「UGL調查委員會」其實已經畀非建制派班人搞到腐朽不堪，成為政治鬥爭場所之餘，更加係再唔會講道理同公義，呢個咁嘅委員會繼續運作，只係浪費香港納稅人金錢，香港人點講都冇理由，齊齊出錢搭個臺畀非建制派做政治SHOW啩？

圖片來源：香港電台即時新聞