靠引述可信性成疑「消息」去攻擊政敵上位嘅民主黨議員林卓廷，攻擊完人後永遠拎唔出實質證據，結果梗係誠信破產啦。不過，林議員對「亂隊」呢種手法仍係樂此不疲，最近之嘛，佢又引述所謂「消息」去攻擊某位疑似副局長人選。林卓廷同佢一班同路人不斷「唱紅抹黑」疑似政府官員人選，講到底都係想延續政治鬥爭路線，唔想畀香港靜落嚟，用心可以話係非常歹毒。

引「消息」只為政治攻訐

到底林卓廷今次政治攻訐邊個呢？原來係團結香港基金會副總幹事李浩然博士，事緣坊間近日突然傳出，話新一屆特區政府想搵李博士出任政制及內地事務局副局長，由於李博士立場被指親建制，結果咪引嚟林卓廷狂轟濫炸囉！佢「引述消息」話喎，李博士曾經做過貴州省貴陽市息烽縣擔縣長助理，情況好罕見，質疑對方係唔係共產黨黨員。

他又認為，李浩然多年從事學術工作，大部份時間都係進修及讀書，質疑李是欠缺資歷，總之就講到對方一無是處，樣樣唔掂咁啦。哈哈，對於林卓廷嘅說法，識笑真係好好笑，呢啲咪就係典型「唱紅抹黑」嘅卑鄙手法囉；李博士呢件事，其實同之前盛傳會做教育局副局長嘅蔡若蓮博士一樣，喺林卓廷同一眾非建制派人眼中，任何佢哋睇唔順眼嘅，都一定唔適合做官員，哪管對方經驗豐富、有足夠才能同經驗都好，結果都係一樣。

學者入閣 例子不少

李博士有冇政黨背景，囍雨喺呢度當然不作揣測啦，李博士自己都未講、政府又證實，咁到底有咩好講呢？反而林卓廷等人，就算政府已經換屆都好，仍然堅持「政治凌駕專業」，呢樣先令人憂慮嘛。

林議員，試問一句，學者入閣，中外經驗多不勝數，單以香港為例，上屆運輸及房屋局張炳良、財經事務及庫務局陳家強，今屆勞工及福利局羅致光等等，好多學者做官前都有加入政府諮詢委員會，目的就係將學術上種種啟迪帶入政府，改善施政。

無證無據 砌生豬肉

林卓廷成日將自己做過幾年廉政公署初級職員嘅事掛喺口邊，抽水就識得講廉署，但指控人就從來拎唔出實證；成日話消息消息，林卓廷自己有冇去核實過先出嚟講？仲有最緊要係，證據呢？

查實講穿咗，林卓廷等人都係唔想一啲同自己政治立場唔一樣嘅人加入政府啫。呢種黨同伐異嘅思維，其實真係好可笑，好似佢前黨友羅致光咁，為咗要加入新一屆政府做問責局長，最終喺壓力下被迫辭去民主黨黨籍，咁民主黨即係點先？同你理念近、唔想退黨，只係因為要加入政府你就迫走人；而家同你立場未必相近，你又唔准佢加入政府，咁你玩晒啦！

圖片來源：RTHK