中國第一艘航空母艦遼寧號訪港，香港社會普遍表示歡迎，從連日到場參觀者嘅反應亦可以睇到，大家對於祖國擁有自己嘅航母都感到好光榮同自豪。不過，反對陣營媒體同一班「逢中必盲反」嘅網民，當然繼續合作唱衰呢項盛事啦，一時又話隻艦唔掂呀、一時又搵啲個別唔理性嘅訪問內容去大肆炒作，總之就係全方面唱衰同中國有關嘅一切，講真吖，睇到呢啲言論，囍雨真係覺得好大陣酸味，好鬼葡萄囉。

反對陣營連遼寧號背景都唔知

遼寧號嘅歷史，相信唔使囍雨多講，好多人都已經知道。冇錯，遼寧號原本係前蘇聯海軍嘅庫茲涅佐夫元帥級航空母艦，建造期間由於蘇聯解體，解體後俄羅斯同前蘇聯加盟共和國烏克蘭因為經濟原因而未能達成協議，最終被中國買咗落嚟續建。

結果，國家用咗差唔多35億美元去擴建同改造遼寧號，而要維持航母運作，每年大約就要用30億元人民幣（約34億港元）。反對陣營好多人唱衰遼寧號，其中一個理由就係話呢艘航母只係「復刻版」，唔值得大家注意同自豪喎，講出呢種評論，講真，真係好無知，同埋完全冇世界觀可言。

全球八個國家有航母 中國係其中一個

首先，大家知唔知全世界咁多個國家，到底有幾多個擁有航母呢？答案係：八個，除聯合國安理會五個常任理事國，即係中國、美國、英國、法國、俄羅斯之外，仲有意大利、印度同泰國。

剩係睇呢個數據，大家撫心自問，中國作為全球八個擁有航母嘅國家之一，真係一啲都唔值得光榮咩？仲有喎，大家唔好唔記得，中國據報正自主研發另外兩艘航母，不久將來正式服役，即係中國將有三艘航母，數量上位於世界前列，乜呢個唔係代表住中國科技同經濟發展嘅進步咩？

中國未來仲有兩艘航母服役

況且，其實連中國軍方亦承認，遼寧號主要用途係用於「科研」、「實驗」同「訓練」，某程度上亦係未來兩艘自主研發航母嘅「樣辦」，單純話遼寧號係「復刻版」、「舊船」，根本就係「極度無知」嘅評論，完全唔知道國家發展到底有幾快。

除咗質疑遼寧號背景外，反對陣營其他主要嘅攻擊手法，包括採訪一啲到場參觀嘅市民同遊客，刻意抽取講得比較「激」或者「偏頗」嘅內容，繼而「煲大」佢。呢種手法，其實亦凸顯出反對陣營相當葡萄，講真，呢啲訪問內容頂多係「一家之言」，代表性亦成疑外，更加唔代表官方立場，唔通真係鬧到冇嘢好鬧，所以要「煲大」個別參觀者嘅言論去「自HIGH」？如果真係咁嘅，SORRY呀，真係好玻璃心囉！

逢中必反凸顯玻璃心

最後，關於無理「唱衰」遼寧號，真係不得不提《生果報》。《生果報》話喎，遼寧號船底「生鏽」，仲引述軍事迷講，話保養真係做得好差；誰不知天有眼，有關報道一出，迅速畀人踢爆「內容出錯」，原來船底所謂「生鏽」，根本係正常現象，目的係要「去除藤壺貝類」，以免影響運作。

《生果報》逢中必反，唱衰遼寧號可以話預期之內，呢份嘢明明就風雨飄搖，但仍然唔知悔改，拒絕由新聞內容方面著手去改革，呢個咪「細節決定成敗」囉。講到底，遼寧號訪港係大事，部份人唔喜歡國家，最多咪唔好理、唔好睇囉，何必因為見住國家日漸強大，而搞到自己變玻璃心吖，冇必要架，唔好咁傻啦！

圖片來源：政府新聞處