2014年違法佔領行動在旺角清場期間，多人因未按法庭臨時禁制令要求離開，被律政司控告「刑事藐視法庭」罪，當中包括黃之鋒等11名被告，選擇認罪並開始求情；就喺黃之鋒代表律師幫佢求情嘅時候，囍雨留意到黃之鋒除咗用「確保示威者安全」作為求情理由，佢律師仲話黃之鋒想之後參選議員，如果判囚三個月會摧毀佢願望。老老實實，如果想參選做立法會議員，點解當初唔遵守法律，畀人告果時仲要成日話政治打壓先？

想參選不是求情理由？

囍雨唔係法律界人士，唔太清楚到底點樣先可以構成合理嘅求情理由，但以一個普通人嘅角度睇，囍雨完全唔覺得想參選立法會係咩求情理由。如果黃之鋒一早想參選立法會，又好清楚如果「違法抗命」而被拉、被判監超過三個月，佢喺未來幾年都唔可以參選，咁點解仲要以身試法呢？一早知道法律後果，甚至知道法律後果會影響佢人生計劃，咁仲試圖犯法，唔係應該罪加一等咩？

整色整水 就係想參選

立法會議員作為代表市民嘅代議士，可以話係市民嘅榜樣或者模仿對象，黃之鋒等人成日挑戰法律，如果畀佢選到做立法會議員，會係咩境況？日日開會果時玩衝擊？玩拉布拖延政府議案？呢啲全部都係未知之數，但囍雨肯定黃之鋒做咁多嘢，好多都係參選立法會議員嘅鋪排，佢之前司法覆核挑戰參選立法會要夠21歲嘅法定年齡要求，一切都係想參選！

想參選，就要累積人氣，想累積人氣，作為非建制派就要「有所作為」；但所謂「有所作為」並唔係指佢為香港市民做咩好事，而係要不斷搞事，話畀啲激進選民聽，「反政府、反中央」搵黃之鋒啦！仲要激過老一輩激進派如長毛、大嚿、毓民等先可以「跑出」。黃之鋒成日喺度整色整水，就係要keep住人氣，點知而家出事喇，就求情話唔好判佢坐監超過三個月，因為咁樣會令到佢喺未來幾年冇得參選。黃之鋒作為一個「積犯」，唔止一次犯法、破壞社會秩序，仲要明知法律風險大，大家話應該點判佢呢？

「自決派」也要參選？

平心而論，囍雨覺得黃之鋒唔應該參選，點解？黃之鋒作為一個與外國勢力、「台獨」勢力合流，又爭取香港「民主自決」即係變奏版「港獨」嘅政客，既然要「自決」香港命運，甚至可能要推倒現有政權，點解仲要參選，成為中華人民共和國香港特別行政區體制內嘅立法會議員呢？情況就好似話一個人唔承認一隊足球隊代表某個地方，不過某人都想踢埋一份咁。黃之鋒，你有骨氣嘅，就做一個始終如一嘅街頭戰士，唔好覬覦立法會嘅職位同用公帑出嘅薪水啦！

原圖：RTHK