是咁的，黃之鋒雖然表明會承認「刑事藐視法庭」，但其實完全冇「悔意」可言。佢喺法庭外對住傳媒話，雖然新任特首林鄭月娥上場後講明要「大和解」，但「面對眾多涉及政治目的」嘅審訊，以及涉及四位立法會議員宣誓司法覆核案件未有結果，佢不會覺得有任何同政權和解嘅空間咁話。其實證據確鑿，都唔到佢唔認罪，但係唔「和解」係要討好激進嘅選民抑或怕會失去「政治議價」能力？

歪理多多拒絕和解

黃之鋒一向係將一啲似是而非嘅所謂理論，包裝成冠冕堂皇嘅口號，藉此抹黑政府同建制派，做到煽動市民嘅效果。一如以往，黃之鋒拒絕「和解」嘅理由同樣都係廢話連篇，就等囍雨再一次KO你啦！

自己有做錯 何來政治檢控？

首先，黃之鋒其中一個拒絕和解嘅理由，係因為「面對眾多涉及政治目的」嘅審訊。吓？審訊有政治目的？審訊係由司法獨立嘅香港法院負責喎，香港法院處事一向只問證據、不問政治，黃之鋒你咁講，即係侮辱香港法官啫！黃之鋒用行動破壞法治仲唔夠，而家竟然被控「刑事藐視法庭」期間，都繼續侮辱香港法院？囍雨真心覺得佢「超錯、超離譜」囉。

第二，黃之鋒之所以會接受審訊，全因佢真係做過違法，或者涉嫌違法嘅事。囍雨其實已經講過好多次，如果你真係有做過違法或者涉嫌違法嘅事，最終畀執法部門檢控的話，咁只係「法治精神」嘅體現；相反，如果執法部門明明認為你違法，但因為政治理由而不作檢控的話，咁就真係「政治凌駕法治」，甚至係「人治」喇。

黃之鋒請你撫心自問，自己被人檢控，究竟係執法部門濫告吖，定係你自己有做過所謂「抗爭」行動，可能觸及法律界線而被檢控先？

違法《基本法》 政府當然要執法

第三，關於議員宣誓司法覆核案。或者黃之鋒真係太忙掛住要抗爭啦，佢可能真係完全冇睇過、冇聽過高等法院首席法官張舉能係審理「青年新政宣誓案」時點講。張官當時清楚指出，執行《基本法》係特首嘅憲制責任，而執行嘅方法，就係透過司法覆核！

到底你明唔明呀，而家係因為有四名議員涉嫌宣誓期間，違反《基本法》以及《宣誓及聲明條例》，為咗執行《基本法》、維護《基本法》，上一任特首梁振英係必須提出司法覆核嘅，對梁振英來講，甚至可以話係「冇選擇」可言。既然係咁的話，點解呢個會成為你拒絕和解嘅理由呢？唔通因為司法覆核案涉及你黨友羅冠聰，所以你就搬龍門，認為「人治」可以凌駕「法治」？

拒絕和解因為要撈政治油水？

講到底，香港眾志同黃之鋒等自決派，由始至終都唔想社會變得和諧，囍雨有理由相信，社會變得和諧，呢班激進自決派就會失去存在價值同生存空間，為咗繼續撈取政治油水，甚至欺騙市民取得立法會議席，自決派係絕對唔想見到香港出現「和解」嘅情況，黃之鋒今次自己都講到出口，過去幾年到底係邊個撕裂社會，大家心中有數啦。

圖片來源：Takungpao