涉及前特首梁振英嘅「UGL事件」已經擾攘多時，梁振英一方已經多次提出確切證據去澄清，但以曾做過廉政公署初級調查員的民主黨立法會議員林卓廷為首嘅非建制派，仍然堅持炒作、炒作，再炒作，認真無奈。其中，嗰個成日扮晒反貪專家嘅林卓廷就最好笑，有事冇事都拉落廉政專員白韞六身上，多次明示暗示白專員「包庇」梁振英，結果，連非建制派自己友都要摑佢一巴，重申廉署有「防止干預」機制，你話好笑唔好笑吖？

林卓廷無理攻擊白韞六

新任特首林鄭月娥上場，尋日會見傳媒時就被問到會點樣處理「UGL事件」，林太就重申，如果執法部門真係正在調查的話，佢自己唔會干預或者介入相關工作。呢個答法非常正路，冇乜可以挑剔，但林卓廷仍然表示唔收貨喎，話林鄭月娥畀「梁振英舊部」白韞六過渡去新一屆政府繼續做廉政專員，好難令市民有信心喎！

林卓廷專門針對白韞六，藉唱衰廉政公署去撈取政治籌碼，老實講，已經唔係第一日，就連囍雨亦寫過好多篇文去批評林卓廷嘅行為。喺呢度，囍雨再次挑戰林卓廷，如果佢有實質證據證明白韞六係有徇私枉法嘅，唔該佢即時拎出嚟，否則唔該佢立刻停止政治攻訐，廉署個金漆招牌得來不易，香港市民絕對唔容許呢個招牌畀人用抹黑同老屈嘅手法去嘗試打爛！

非建制派「自己友」都睇唔過眼

不過天有眼呀，睇唔過林卓廷劣行嘅唔止囍雨一個，就連公民黨黨籍嘅前廉署總調查主任查錫我亦話，廉政公署本身亦有機制防止干預，唔可能出現案件無故失蹤嘅現象，案件必定有結果，即使冇足夠證據起訴，亦要得到「審查貪污舉報諮詢委員會」確認，呢個機制絕對唔係「橡皮圖章」。

聽到未呀林卓廷，好心你唔識嘢，都至少要學吓「自己友」查錫我嘅說法，唔好吹得就吹、講得就講啦。廉署調查，絕對唔可能畀某一個人干預得到，特首冇可能隻手遮天，廉政專員更加冇可能咁做啦！你冇證冇據下，不斷唱衰當事人梁振英，本身行為已經極之唔公義，而家為咗個人私利，仲連廉署都接連不斷唱衰埋，行為已經超越文明底線。

國際報告認同香港廉政水平極佳

老實講，白韞六過去幾年做廉政專員，表現絕對係恰如其分，美國權威智庫組織「傳統基金會」、專門監察貪污腐敗嘅國際非政府組織「透明國際」，以及知名國際機構「世界正義工程」，佢哋嘅報告全部都顯示，香港廉政情況極好，「透明國際」主席烏蓋茲甚至認為，香港嘅廉潔水平，係世界各地嘅「反貪典範」！香港有咁嘅表現，試問白韞六仲點解要下台？要下台，都係你個大話精林卓廷先啦！

圖片來源：星島日報