「港獨」思潮近年喺香港湧現，除咗部分擺到明要爭取「港獨」嘅政客外，唔少政客其實更卑鄙，皆因佢哋係玩「暗獨」，表面上爭取「自決」，實則上就係支持變奏版「港獨」，所謂「自決派」就係咁解。全方位打擊「港獨」，基本上係未來重點方向，偏偏喺呢個時候，知名雜誌《福布斯》就發表咗一篇由美國國家安全分析師Anders Corr寫嘅文章，除講到明呼籲歐美支持香港獨立，仲話要對中國實施經濟制裁以達到目的，講到咁明目張膽，唔知呢啲係咪「外國勢力」嘅心迹呢？

前美國政府人員支持香港獨立

Anders Corr何許人也？呢個擁有哈佛大學博士學位嘅人，曾經喺美國軍事情報機關工作過五年，履歷絕對非一般，佢今次篇文標題已經開宗明義，講到明「美國及歐盟應該為香港要求民主及獨立」，內文就寫香港值得擁有民主同獨立，英國以至歐盟就應該糾正過去「錯誤」，為香港要求民主同獨立，仲話如果中國冇「正面」回應，可以考慮對中國實施經濟制裁。

以前啲美國官員、前官員最多都係關注香港民主情況啫，呢個Anders Corr擺到明支持「港獨」，呢啲說法就算唔代表美國官方立場，亦好難令人唔聯想到，部份美國官員可能真係持有呢類睇法，如果美國政府真係唔係咁諗，唔該盡快澄清，唔好等呢啲人喺外面亂講廿四好喎！

美國介入香港事務早有前科

睇到呢單新聞，囍雨隨即諗起，之前有美國電視台訪問美國前高官白邦瑞（Michael Pillsbury），佢喺2014年10月接受訪問時，親口承認美國政府有份介入「違法佔領」行動，而美國駐港總領事更有人專門負責《香港政策法》，確保香港嘅「民主發展」；白邦瑞仲承認，美國政府有透過唔同渠道提供資金，協助香港推動「民主」。

美國點解咁熱衷於支持香港「民主」運動，會唔會係想將香港打造成「反中橋頭堡」，令到美國政府可以從中得益？呢個問題真係值得深思。

話囍雨多心都好啦，將今次Anders Corr嘅專欄、之前白邦瑞嘅訪問，以至前政務司司長陳方安生、民主黨創黨主席李柱銘，以及香港眾志秘書長黃之鋒等人到英、美，甚至台灣同其他政治勢力合流嘅事件串連埋一齊，種種跡象顯示，啲外國政治力量不斷聲稱關注香港落實「一國兩制」情況，背後可能係想搞「港獨」，呢呢呢，唔係危言聳聽，就好似同香港自決派議員合流嘅台獨組織「台灣國會關注香港民主連線」咁，佢會唔會單純支持香港民主咁簡單呢？相信好多市民都會覺得「一定有古怪」囉！

講到呢度，囍雨就諗起國家主席習近平日前訪港時發表過嘅一番說話，習近平提到「利用香港對內地進行滲透破壞的活動，都是對底線的觸碰，都是絕不能允許的」，而家啲「外國勢力」咁「關心」香港，真係不得不防。

原圖：《福布斯》網站截圖