踏入七月，暑假即將開始，而每逢暑假，坊間唔同學校、組織都開始舉辦形形色色嘅交流、研習以至體驗活動等等。囍雨近日就喺網上見到一個由港大法律學院搞嘅探索營，主題係「法治與香港社會」，對象係全港高中學生，內容有關於法治概念，相關概念又包含「守法」、「穩定的社會」等；本來有大學搞下日營教下法律係好平常嘅事，但當囍雨睇到講員係戴耀廷，就當堂睇到眼都凸埋，由搞違法佔領嘅戴耀廷講守法、穩定，講笑咩？

戴耀廷其身不正

首先，囍雨對港大法律學院舉辦有關通識課程、法治相關嘅講座或者日營，絕對表示歡迎，但港大法律學院有咁多法律專家，係咪一定要由戴耀廷去做分享呢？相信香港好多市民都依然記得，自從2013年1月開始，戴耀廷就提出違法佔領嘅概念，仲要日日開盡個「喇叭」去宣傳；到咗2014年9月尾，呢個所謂嘅法律學者仲高調宣布啟動違法佔領，於是長達79日，對社會、經濟、民生甚至市民生活都大受打擊嘅違法佔領行為就開始，當時除咗警察維持治安艱難，好多市民都叫苦連天，而家叫戴耀廷講法治，囍雨真心覺得唔係咁適當囉！

大家可以想像到，如果真係由戴耀廷去講法治，當佢講到「守法」、「穩定的社會」等概念時，如果佢同啲學生講要守法，從而令社會穩定，佢必然會自打咀巴，變相否定自己嘅違法佔領行動，戴耀廷會唔會咁做呢，囍雨就覺得未必喇！相反，戴耀廷如果講到相關嘅法律概念時，又會否再搬出佢所謂「違法達義」、「佔中」嘅理念出嚟呢？例如同啲學生講喺「一般情況」下，市民係要守法嘅，但到咗「非常時期」，例如市民覺得政府法案係唔公平、唔公義嘅時候，市民就可以用違法抗命（即佢哋口中嘅「公民抗命」概念）去反對政府，劇本就係咁喇，信不信由你。

戴耀廷拒負罪責 何以教人守法？

問題就嚟喇，如果戴耀廷向啲中學生灌輪違法抗命嘅時候，可能係同緊啲學生講可以「選擇性守法」，咁幾時守法由邊個決定呢？就係由一班聲稱係「民主鬥士」嘅人去決定喇；而違法抗命完會唔會「伏法」，以顯示自己承擔罪責、完善法治呢？同樣係由呢班「民主鬥士」去決定！日前「佔領三子」之一嘅陳健民就表示，如果政府要繼續告佢哋串謀罪同煽惑罪，各「違佔」被告就必須抗辯，即意味戴耀廷佢哋極可能會「反口」唔認罪。大家諗下，一個策劃違法行動仲極可能唔會認罪嘅人，去教學生法治甚至守法，會唔會諷刺咗啲呢？連自己都唔肯承擔罪責，仲好意思教人守法？

其實，無論係違法抗命，抑或民主派口中講到非常漂亮嘅「公民抗命」，都係一個非常危險嘅概念，到底作為公民，幾時要守法，幾時唔駛守法，基本上係一個由佢哋去講或者定義嘅概念；但如果任由佢哋提出違法抗命然後又唔承擔罪責，試問我哋嘅社會又點會有法治可言呢？

囍雨唔知道港大法律學院今次安排戴耀廷向中學生講法治有冇咩特別意思，抑或純粹係因為戴耀廷係憲法專家所以搵佢做主講，但誠如囍雨剛才所講，戴耀廷自己其身不正，根本就唔適合向學生講解法治、守法以至社會穩定等概念。進一步去講，如果戴耀廷到時真係向學生講解埋違法抗命嘅概念，係咪即係向中學生洗腦，喺佢哋心中埋下違法抗爭嘅種子先？諗到呢度，再望下個「探索營」呢個包埋午餐嘅海報，囍雨真係覺得好擔心！

原圖：Takungpao