港獨組織香港民族黨本來計劃今晚舉行港獨集會，但由於性質違反《基本法》，故此警方向民族黨發出「禁止集會通知書」，代表民族黨唔可以合法地搞一個擺明宣揚「港獨」嘅集會。開宗明義去分裂國家，自然唔可以合法咁去集會，呢個直頭係基本過基本嘅國際標準啦，稍為知道個「醜」字點寫嘅人，理應會知衰唔好再咁多投訴，偏偏民族黨嗰個所謂召集人陳浩天，收到「禁止集會通知書」後繼續亂吹，話質疑警方咁做係「違憲」喎，哈哈，真係好大個笑話呀！

民族黨批評別人「違憲」？

講真，民族黨嘅成立，本身已經係「違憲」一部份啦，《基本法》第一條已經講到明：「香港特別行政區是中華人民共和國不可分離的部分」，民族黨成立，本身就係鼓吹「港獨」、支持「港獨」同爭取「港獨」，擺明就違反《基本法》第一條，咁講到尾唔知邊個「違憲」呢？

再講，香港警察係政府一部份，代表係政府部門，真心想問陳浩天一句，試問有邊個政府部門有權去做違法《基本法》嘅行政決定？你個黨講明要搞「港獨」喎，而家申請舉行集會，即係「切實進行」緊「港獨」活動啦，咁試問香港警察又有咩權力去批准你申請呀？唔好玩啦！

分裂國家乃實際行動 不是政治立場

仲有，陳浩天話喎，警方係因為「政治立場」而唔畀佢「集會」，真係大錯特錯、以偏概全。陳浩天主張「港獨」，呢個冇錯係「政治立場」，但當你正式去搞集會、宣傳「港獨」，即係搞「港獨」嘅時候，呢個就唔係「政治立場」咁簡單喇，而係貨真價實嘅「行動」，亦即係「分裂國家」、「破壞國家領土完整」，針對嘅係你嘅「行動」，唔係你嘅「立場」呀，陳浩天到底你明唔明先？

老實講，有啲道理真係已經講到悶，但對住陳浩天咁嘅人，真係要不厭其煩多講幾次。香港人，係有「集會自由」同「言論自由」，但唔代表有「搞港獨自由」，陳浩天唔該唔好混淆視聽。香港人擁有嘅各項自由，全部都係由《基本法》保障架，你要享有呢啲「自由」，前提就係唔可以違法《基本法》，即係陳浩天自己所講嘅「違憲」，若然你做「違憲」行為嘅，《基本法》畀你嘅自由，自然會被限制啦，乜好難理解咩？

圖片來源：香港電台即時新聞