二十幾三十個屬於激進自決派嘅示威者，尋晚又無啦啦走去意圖「佔領」灣仔嘅金紫荊雕塑，其中六個激進示威者仲捐咗入去金紫荊嘅花瓣裡面匿埋幾粒鐘，結果要勞動警方嘅高空工作隊去將佢哋一個一個咁「救」落嚟。呢班激進示威者，美其名就話自己係「非暴力抗爭」，但查實大家睇清楚，佢哋其實曾經「頑抗」，有同在場執法人員拉扯，咁都唔暴力？講真，呢個看似非暴力嘅佔領金紫荊行動，背後有好多衍生出好多問題，如果單單話唔用暴力就對社會冇影響的話，咁肯定係誤導人囉。

「非暴力」不是「大晒」

今次嘅激進示威者，主要係來自香港眾志、社民連和人民力量呢三個激進自決派政黨。呢，即係早兩日用黑布覆蓋金紫荊雕塑嗰班呀，今次「佔領」金紫荊嘅，其實都係同一班人之嘛，佢哋成日打住「非暴力」做藉口，好似講到只要唔用暴力，就做乜都可以咁，擺明就係捩橫折曲啦。

先唔好講佢哋爬上去同「佔領」期間一度拉拉扯扯，更唔好講呢種行動會影響其他使用者，更過份係，佢哋「佔領」金紫荊雕塑唔單止，仲一個二個爬晒入去雕塑入面，佢哋知唔知呢種行動有幾危險。金紫荊雕塑高6米，佢哋爬入花瓣裡面，閒閒哋都2至3米高啦，咁嘅高度，大家諗都諗到，如果唔小心跌落嚟，係一定會受傷，講真，大家都唔想見到呢個情況發生囉！

示威者行動可影響他人安全

仲有，由於佢哋唔肯離開嘅關係，結果要出動警方高空工作隊將佢哋移離花瓣位置，雖然話警方有晒設備啫，但升到咁高，一樣點都會有危險性，將危險延伸到會影響他人安全嘅地步，香港市民真係仲覺得「非暴力」就大晒？

講真，香港係一個高度自由嘅社會，有人唔喜歡慶祝回歸，其他人都冇權講乜。但大家同時唔可以忘記，你要趁回歸去示威，前提係唔可以阻礙到想去慶祝回歸嘅人，因為任何人同樣都冇權，令到其他人失去慶祝回歸嘅機會！

影響他人合法權利 自決派責無旁貸

眾所周知，金紫荊雕塑係喺1997年由國務院送畀香港，以慶祝香港終於回到祖國懷抱，對支持回歸嘅市民來講，可以話係意義重大，而且回歸當日更會有慶回歸活動喺嗰舉行，自決派今日咁做，即係存心破壞他人慶祝回歸嘅機會，根本就係極自私！

點都好，希望香港市民唔好再畀自決派誤導，佢哋所謂「非暴力」只係掩人耳目，更重要而唔可以做嘅，就係影響其他市民嘅合法權利，雖然呢班人而家已經畀警察拘留晒，但嗰個香港眾志嘅秘書長黃之鋒就繼續超唔要面，不斷透過唔同人士，嘗試喺社交網站呼籲人去警署聲援。聲援？聲援咩呀？又係政治打壓呀？好心黃之鋒就唔好咁流氓啦，拜託！

圖片來源：大公報